Headlines News :
Home » , , , , , , » Rezolusaun Defini Timor-Oan Kaer Rasik Kuda Talin

Rezolusaun Defini Timor-Oan Kaer Rasik Kuda Talin

Written By Timor News Online on 10/30/2014 | 9:00 PM



Rezolusaun ne’ebé maka foin lalais Governu ho Parlamentu Nasional hasai hasai hodi hapara kontratu ba judisiariu internasional sira ne’e, atu hatete katak, tempu to’o ona Timor-oan hare nia soberania no kaer rasik nia kuda talin.
Tuir Segundu Vice Prezidente Parlamentu Nasional, Aderito Hugo katak, rezolusaun ne’e laos atu hafoer Timor nia imajem iha mundu internasional, maibe atu define katak, tempu ona atu hadia Estadu ida ne’e tenki hare rasik ninia soberania.
“Soberania maka ita rasik kaer ita nia kuda talin ne’e, sei ema internasional balu maka mai kaer hela, tempu to’o ona para ita halo avaliasaun ba ita nia responsabilidade Estadu. Rezolusaun ne’e atu refleta intrese Estadu, laos atu defende intrese grupu ida nian,”esplika Aderito Hugo ba Jornalista sira Kinta (3/10) iha Parlamentu Nasional.
Aderito dehan, prosesu atu halakon juis no advogadu internasional sira ne’e la’o hela, tanba Primeiru Ministru Kay Rala Xanana Gusmão mos asina ona akordu ho Portugal, kona-ba atu halo rekurutamentus juis internasional ne’e.
Aderito haktuir, nia la hanoin katak, saida maka povu halo ba rai ida ne’e, atu responde deit imajem Timor Leste nian iha mundu internasional.
Nia esplika, Governu, Parlamentu no Tribunal hot-hotu servi ba povu ida ne’e. laiha ema ida servi para hetan naran diak internasional, maibe naran diak ba povu no nasaun ida ne’e.
“Tanba intrese internasional, sei intrese nasional nasaun ninian ne’e laiha problema, at mos laiha buat ida. Importante ba sira maka imajem Timor Leste nian iha estranjeiru. Entaun oinsa ho povu ida nain ba rai ne’e ninia imajem rasik, no ninia kredibilidade atu hetan servisu justisa ida ne’ebe justu,”katak Aderito.
Hatan konba-ba rezolusaun ne’e kontra konstituisaun, Aderito Hugo dehan, Parlamentu Nasional iha nia mekanismu rasik atu servi.
“Hau dehan ona, Tribunal goza ninia aktus independensia, maibe nia servi ba Estadu, hanesan mos Parlamentu, goza ninia kompetensia tomak, maibe kontestu Estadu nian ne’e, Parlamentu tenki hakruk, tanba intrese Estadu nian maka bo’ot liu hotu,”esplika Aderito Hugo.
Rezolusaun ne’e sei la barailha buat ida iha prosesu ne’e, tanba rezolusaun ne’e, atu hadia Timor Leste nia setor hot-hotu. Tanba Timor Leste agora iha hela faze konstrusaun Estadu, entaun laiha istituisaun Estadu ida ke perfeitu.
Tanba AderitoHugo dehan, faze kontrusaun Estadu koalia kona-ba atu hadia performance ezekutivu ninnian, tansa maka labele hadia performance iha area justisa ninian.
“Se ita iha referensia ne’ebe ke iha tempu ona atu halo avaliasaun, ba intrese nasional no siguransa nasional,”katak Aderito Hugo.
Rezolusaun ne’e, refleta husi orgaun ida ne’ebe maka reprezenta povu, tanba orgaun Estadu hot-hotu ne’e servi ba povu.
“Se rezulusaun ida ho karakter ida intrese nasional ho siguransa nasional ne’e, hot-hotu tenki hakruk, tanba ita hot-hotu servi ba estabilidade nasaun nian,”afirma Aderito Hugo.
Laiha orgaun ida atu nia mesak la’o tuir nia hakarak, hot-hotu tenki servi ba Estadu no intrese nasional, i proteje siguransa soberania nasaun ninian. tanba Parlamentu Nasional mos sei lahalo buat ida komformi nia hakarak.
Aderito esplika, kona-ba kazu ConocoPhillips ne’e, Timor Leste laos lakon, maibe Timor hakarak kolekta tasa ne’ebé maka kompañia sira subar hela.
“Ema hanoin katak ita atu selu tan miabe la’e, kompañia sira lakohi selu taxa ne’ebé maka ita atu ba kolekta. Ita kuandu atu husu sira atu selu, sira dehan katak, la’e ami la selu, ami lori imi ba tribunal,”relata Aderito Hugo.
Nia hatutan, kompañia sira ne’ebé lakohi selu taxa hamutuk US$ 35 miloens ne’e maka, Timor Leste atu husu sira selu, maibe sira lori fali ba tribunal, laos Timor mak lori sira ba Tribunal.
“Ita lakon iha Tribunal Dili ne’e, US$ US$ 35 miloens, katak ita atu ba kolekta ita nnia direitu ida ne’e, maibe sira la fó, sei ita manan karik, US$ 35 miloens ne’e, sira tenki selu mai ita,”tenik Aderito Hugo.
Laos hanesan ema balu nia hanoin katak, Timor Leste tenki selu fali US$ 35 miloens, Timor Leste la selu buat ida, katak Aderito Hugo.
Iha fatin hanesan, deputadu Eladio Faculto husi Bankada FRETILIN mos hatete katak, rezolusauna ne’e laos atu hafoer Timor Leste nia naran iha mundu internasional.
Tanba mundu internasional mos tenki hatene politika nasaun ida-ida no ninia sirkumstansia rasik.
“Hau fiar katak, ita sira ne’ebé maka luta b alia los, ita sei hare ita nia situasaun rasik iha ita nia rai. Tanba labele dezenvolve ba mundu, maibe ita tenki dezenvolve tuir ita nia sirkumtansia rasik mos,”dehan Eladio.
Tanba iha mundu mos, iha nasaun barak maka ba hasai nasaun seluk nia direitu no ninia integridade soberania, maibe la hafoer tok nasaun sira ne’e nia naran ba mundu internasional, dehan Eladio Faculto.
Antes ne’e, Prezidente Asosiasaun Advogadu Timor Leste, Manuel Tilman hatete katak, rezolusaun ne’ebé Governu ho Parlamentu Nasional deside hodi hasai iha loron hira liu ba liu husi enkontru segredu, hafoer Timor Leste nia naran iha mundu internasional.
“Ita nia naran iha internasional, foer tanba buat ida resolusaun ne’e. kompañia petroleum sira iha mundu sei lahateke tan Timor Leste. Labele hanoin katak, iha mundu ne’e, petroleum maka Timor nian deit,”esklarese Manuel Tilman.
Direitu Kontrola Estadu
Hatan kona-ba ejijensia Veteranus sira nian kona-ba atu investiga Tribunal Rekursu no Ministriu Publik kona-ba Timor Leste lakon iha Tribunal Dili Arbitrazem Singapore, derito Hugo dehan, Veteranus sira mos iha moral tomak atu kontinua akompña instituisaun Estadu sira hotu atu servi povu ne’e ho dignu.
Povu hotu iha direitu atu fó sira nia hanoin kona-ba saida deit, tanba nasaun ne’e nasaun demokratiku.
Veteranus iha direitu tomak atu koalia kona-ba saida maka la’o iha Estadu ne’e nia laran.tap
Source: Diairu JN
Share on :

1 comment:

  1. TEMPU TO'O ONA ATU UKUN NA'IN SIRA TENKE REFLETE WAINHIRA FOTI DESIJAUN RAI TIMOR IHA IMI LIMAN WAINHIRA SAI DIAK IDA RUA NIAN NO SAI AAT MAK POVU SEI TERUS TAN NE'E PRESIZA PUBLIKA BA MEDIA NAFATIN KARIK IHA KAZU IMPORTANTE RUMA NE'EBE EMA TOMAK TENKE HATENE OU DI'AK LIU TAN LOKE DISKUSAUN ABERTA ATU EMA HOTU BELE ESPRESSA NIA IDEA

    ReplyDelete

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template