Headlines News :
Home » , , , , , , , , » Rezolusaun Hapara Kontratu Hafoer TL Nia Naran Iha Mundu Internasional

Rezolusaun Hapara Kontratu Hafoer TL Nia Naran Iha Mundu Internasional

Written By Timor News Online on 10/29/2014 | 10:22 PM



Rezolusaun ne’ebé Governu ho Parlamentu Nasional desidi hodi hasai iha loron hirak liu ba liu husi enkontru segredu, hafoer Timor Leste (TL) nia naran iha mundu internasional.
Tuir Prezidente Asosiasaun Advogadu Timor Leste, Manuel Tilman, rezolusaun Parlamentu nian ne’e, sei labele resolve kazu ConocoPhillips, maibe kria fali konfuzaun iha Tribunal, no prosesu ne’e sei paradu hotu.
“Ita nia naran iha internasional, foer tanba buat ida resolusaun ne’e. Kompañia petroleum sira iha mundu sei lahateke tan Timor Leste. Labele hanoin katak, iha mundu ne’e, petroleum maka Timor nian deit,”esklarese Manuel Tilman ba JN-Diário Kuarta (29/10) iha Hotel Beach Garden Praia dos Coqueiros Dili.
Nia hatutan, rezolusaun ne’e, sei la resolve kazu sira ne’ebé maka agora pendente iha Tribunal Singapora nian no iha Dili, resolusaun ne’e atrapalha i kria liu dalan atu hapara prosesu ne’e iha klaran.
Manuel Tilman konsidera resolusaun ne’e, buat ida ne’ebé maka aat lahalimar ba Timor Leste nia komportamentu iha mundu.
“Rezolusaun ne’ebé foin lalais Governu ho Parlamentu hasai ne’e, kontra makas konstituisaun. Resolusaun ida, labele viola lei organika Tribunais, ne’ebé maka regula juis sira ka orgaun ida ne’ebé maka hanaran, orgaun de fiskalizasaun konselhu superior de majistratura,”katak Manuel Tilman.
Labele dehan fali katak, juis sira maka deside ConocoPhillips ninia prosesu, halo oinsa maka atu aplika fali resolusaun ne’e ba Tribunal Singapora.
Manuel Tilman dehan, deputadu sira nia hanoin ne’e iha ne’ebé maka, atu ba aplika fali resolusaun ida ki’ik, ba fali tratadu bo’ot ida, ida ne’e lalos tiha ona. Tanba ida ne’e duni maka, resolusaun ne’e viola konstituisaun tanba resolusaun ne’e la iha forsa.
Manuel Tilman haktuir, Juis internasional sira ne’e mai iha Timor Leste mos, iha akordu koperasaun judisiaria entre Portugal, Cabo Verde, Brasil ho Timor Leste. Resolusaun ida labele viola fali akordu bilateral internasional.
Resolusaun ba atu hapara kontratu judisiariu internasional ne’e, tanba kazu Timor Leste ho ConocoPhillips. Maibe ida ne’e laos juis sira maka sala, maibe Timor Leste kontrata sala advogadu internasional sira ne’e.
“Ita la tau neim Timor-oan ida formadu iha justisa, atu tuir prosesu sira ne’ebé iha Dili no Singapora ne’e, no Tribunal Singapora ne’e mos, ita ladivia atu ba,”katak Manuel Tilman.
Nia esplika, iha tempu ne’eba, bainhira ConocoPhillips hatama prosesu iha Singapura, Manuel Tilman dehan, Timor Leste laiha obrigasaun atu ba, tanba ConocoPhillips depende ba Timor Leste.
“Tanba atu ba tribunal arbitrazem ne’e, parte rua tenki konkorda malu, maibe ita konkorda hakarak ba, entaun ita lakon. Tanba ema manan tiha ona iha Dili, nusa maka sira atu lakon tan iha Singapora,”relata Manuel Tilman.
Nia esplika, labele hanoin katak, advogadu sira iha America ne’e, bele hakarak atu kontra kompañia ida ne’ebé bo’ot hanesan ConocoPhillips. Governu bele selu makas Timor Leste nia advogadu ne’e, maibe ConocoPhillips bele selu makas liu osan ne’ebé maka Governu selu ba advogadu Timor Leste ne’e.
“Ita seidauk selu buat ida. Prosesu ne’e hanesan ne’e, ita lakon tiha, tanba ita nia advogadu Americanu ne’e, hatama rekursu fora   de prazu. Maibe buat sira ne’e sei pendente hela iha Tribunal Rekursu Singapora, kuandu Tribunal Rekursu komfirma Tribunal Dili, maka sei hatama fali tan buat ida naran ezekusaun, maka Timor foin selu US$ 35 miloens ne’e,”afirma Manuel Tilman.
Nia esplika, nia bele halo rekursu extraordenariu ida, para halo oinsa maka bele resolve ezekusaun US$35 miloens ne’e. tanba rekursu ordenariu ne’e, Tribunal sei deside hela. Prosesu ne’e seidauk hotu, kazu 16 ne’e, Timor Leste lakon iha komarka, seidauk lakon iha Tribunal de Rekursu.
Konaba tribunal Singapura, Manuel Tilman dehan, tuir lei internasional hatete katak, desizaun Tribunal Singapora nian ne’e, atu bele tama ba ezekusaun. Katak obriga Timor Leste atu selu ka la selu, Tribunal Dili tenki ratifika sentensa ida ne’e.
Singfika katak, sentensa sai iha Singapora, tama uluk lai iha Tribunal Dili, juis sira iha Tribunal Dili ratifika sentensa ne’e, maka foin Governu selu, se Tribunal la ratifika, Timor Leste labele selu buat ida.
Tanba Timor Leste iha regras ne’ebé hanaran soberania judisial, la submete ba desizaun ida ne’ebé internasional husi Singapora mai, maske iha ona akordu entre ConocoPhillips ho Timor Leste maka foin ba Tribunal arbitrazem.
Hatan kona-ba Governu ho Parlamentu hasai resolusaun atu hapara kontratu ba judisiariu internasional, tanba diskonfia Timor Leste lakon ho ConocoPhillips ne’e, sira maka fó sai dokumentus Timor Leste nian ba ConocoPhillips, Manuel Tilman dehan, lalos, tanba buat hotu iha ninia kontratu, ne’eduni laiha segredu iha ne’eba.
“Buat ne’e ema mos iha Advogadu, so ke, ema nia advogadu ema Americanu, ita nia advogadu Americanu, nusa maka advogadu sira ne’e labele koalia ba malu, dokumentus sira ne’e mos bele sirkula ba malu,”relata Tilman.
Tan nee nia haktuir, kuandu Governu hakarak duni karik, duni maka advogadu Americanu sira ne’e, laos atu ba duni fali juis sira ne’ebé mai husi Portugal, no procurador da republika ne’ebé mai husi Cabo Verde.
“Ita haree didiak konstituisaun, dehan katak, orgaun de soberania hat ne’e, iha funsaun, maibe iha funsaun ketak-ketak, ne’ebé hanaran separasaun de poderes, maibe iha sira nia ezekusaun de funsionamentu, iha interligasaun ba malu hodi hatan ba interese nasional,”esklarese Manuel Tilman.
Husi orgaun hat ne’e, iha orgaun rua maka depende ba malu diretu maka hanesan Parlamentu ho Governu depende ba malu, tanba Parlamentu eleitu direitamente husi povu.
Prezidente da Republika mos orgaun politiku, i dala barak orgaun tolu ne’e sempre hamutuk. Ida ne’e maka konstituisaun hatete.
Manuel Tilman dehan, Tribunal ne’e la’o ketak, tanba Tribunal ne’e orgaun de soberania ho kompetensia atu administra justisa ho povu nia naran. Signifika katak, Parlamentu reprezenta povu, no Tribunal halo justisa lori duni deputadu sira ne’ebé reprezenta povu ne’e nia naran.
“Kuandu hanesan ne’e, deputadu sira ne’ebé maka reprezenta povu, lori sira nia naran maka Tribunal halo justisa, ba hatun fali Tribunal no justisa, nia aneksu ne’e iha ne’ebé. Laos tanba juiz sira deside tiha ona hanesan ne’e ona, entaun hasai tiha juiz sira ne’e,”katak nia.
Manuel Tilman esplika, iha Tribunal ninia ezersisiu no ninia funsaun ne’e, Tribunal iha direitu atu hetan tulun husi orgaun autoridade sira hotu, inklui Parlamentu Nasional, Governu no Prezidente da Republika rasik. Tanba desizaun Tribunal nian, obrigatoriu as liu desizaun politika sira hotu.
Manuel Tilman hatutan, deputadu barak ne’ebé maka tu’ur iha Parlamentu ne’eba ne’e, lisensiadu iha Indonesia, ne’ebé maka hatene saida maka undang-undang ne’e. katak konstituisaun maka as liu, segundu maka lei, tuir fali maka desizaun sira husi Ministru sira i tuir fali maka resolusaun ne’e.
Tanba resolusaun ne’e, hanesan orientasaun ida atu oinsa maka kumpri lei, laos resolusaun atu ba reboga fali lei. Laos atu ba persebe fali hirarkia lei, para kaer fali resolusaun ida hodi altera konstituisaun ne’e rasik.
Nia esplika, Timor Leste lakon iha Tribunal arbitrazem Singapora laos tanba kontiudu, maibe tanba forma, advogadu sira lahatene prosesu ne’e. Sira mai konfundi fali prosesu ne’e krime ho civil. Impostu ne’e laos krime maibe civil, maibe iha America konsidera hanesan krime.
“Entaun sira mai hanoin katak, iha Timor mos krime, entaun sira mos halo buat ne’e tuir fali krime ninian deit. Ita iha ne’e iha prazu ne’ebé lahanesan ho America, maibe sira liu tiha tinan rua maka foin hatama buat ida naran kontestasaun, ida ne’e sala bo’ot, rekursu deit mos hatama sala tiha, liu tiha loron rua maka foin hatama rekursu,”katak Manuel Tilman.
Buat sira ne’e hotu labale ona, no ho atraza sira ne’e hotu maka Timor Leste lakon iha Tribunal arbitrazem Singapure ne’e, informa Manuel Tilman.tap
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template