Headlines News :
Home » , , , , , , » Tribunal Hakarak Rona PM Xanana Ho Longuinhos

Tribunal Hakarak Rona PM Xanana Ho Longuinhos

Written By Timor News Online on 10/30/2014 | 9:23 PM



Tribunal Rekursu (TR) anula desizaun Tribunal Distrital Dili, tanba hakarak atu rona deklarasaun husi Primeiru Ministru (PM) Kay Rala Xanana Gusmão ho Komandante PNTL, Komisariu Longuinhos Monteiro.
Nune’e mos, iha desizaun final, juis titular inkompetente, tanba nia hasai desizaun lakumpri artigu 281 numeru 2 no artigu 286 alinea A iha Kodigu Prosesu Penal.
Artigu 281 konaba sentensa nia rekizitus, numeru 2 hatete, tuir fali relatoriu, tenki hakerek fundamentasaun ne’ebe hatama faktus provadu ka laprovadu, ho fundamentasaun referida iha artigu 278 numeru 7, maske ho remisaun, hamutuk ho espozisaun, kompleta konforme bele, maibe sumaria, ne’ebe hatudu motivu konaba faktu no direitu hodi fundamenta desizaun. Nune’e mos artigu 286 konaba nulidade iha sentensa, alinea a hatete, lahatama fundamentasaun konaba faktus ka direitu, indikasaun, maske remisaun, atu fundamenta tribunal nia konviksaun konaba faktus provadu ka laprovadu, desizaun kondenatoria ka absolutoria.
Tanba ne’e, TR husu tribunal rekoridu halo repetisaun julgamentu, hodi halo apuramentu ba faktu ne’ebe mak konsta iha kontestasaun designamente atu halo inkrisaun ba testamuña nain rua ne’ebe parte defeza aprezenta, hodi hare Calisto ne’e halao orden ka krimi.
“Ho ida ne’e TR anula desizaun TDD. Hau fiar kuandu halo fali julgamentu foun ho prezensa PM no komandante PNTL, Calisto Gonzaga sei absolve, basa nia halao orden hodi kumpri desizaun governu,” dehan defeza kondenadu Calisto Gonzaga, Sergio Paulo Dias Quintas ba Jornalista sira iha TDD, Kinta (30/11).
Iha loron 8 Agustu tinan ne’e, TDD kondena eis komandante Servisu Investigativu Kriminal, Polisia Nasional Timor Leste, Calisto Gonzaga ho pena prizaun tinan 9, tanba tuir tribunal provas provadu duni arguidu komete krime não partisipsaun ho sukrestu (penculikan).
Tanba haruka fila sidadaun Indonesia nain 5 ho Africa do Sul nain ida ne’ebe hatama droga mai TL, sein liu husi Ministeriu Publiku nudar asaun penal.
Tantu iha loron 21 Setembru defeza kondenadu Calisto halo kedas rekursu ba TR hodi bele hetan lialos ba kazu ne’e, tanba nia kliente halao deit orden governu.
Tanba ne’e TR husu TDD halo fila fali julgamentu kazu Calisto Gonzaga hodi rona testamuña PM no Komandante PNTL hodi fo balansu ba kazu refere no hetan duni lialos.
Liu husi audensia julgamentu, teatamuña Faustinho Maia de Carvalho informa, hafoin polisia kaptura tiha suspeitu nain lima ne’ebe hatama droga mai TL, polisia asegura tiha sira iha Kuarte Geral PNTL durante oras rua, maibe liu tiha oras balun Komandante Jeral PNTL, Longuinhos Monteiro akompaña ho Primeiru Ministru (PM) Xanana Gusmão mai hare suspeitu sira. nune’e lakleur deit lori suspeitu sira ne’e ba Prezidenti Republika, Taur Matan Ruak. Liu tiha ida ne’e komandante Calisto Gonzaga akompaña suspeitu sira ne’e ba Jakarta, Indonesia.
Ironia liu mak, bainhira julgamentu juis titular la fo tempu ba defeza atu aprezenta testamuña liu-liu em relasaun ho kazu refere.
Ba kazu ne’e, TDD seidauk simu karta akordaun husi TR atu halo repitisaun julgamentu, se karta ne’e tama tribunal sei halo ajenda ba julgamentu. nty
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template