Headlines News :
Home » , , , , , , , , , » Veteranus Ejije Investiga MP Ho Tribunal

Veteranus Ejije Investiga MP Ho Tribunal

Written By Timor News Online on 10/29/2014 | 10:19 PM



Veteranus no Kombatentes Libertasaun Nasional (VKLN), ejiji ba Estadu atu bele halo investigasaun ka auditoria ba seitor justisa liu-liu Ministerio Púclico ho Tribunal, relasiona ho kazu 16 ne’ebé maka Timor-Leste lakon iha Tribunal Arbitrajen Singapura hasoru kompañia Norte Americano Conocophilips.
Kordenador VKLN, Vasco ‘Criado’ da Gama, hateten, durante ne’e asesor no juis Internasional sira inklui Timor-oan sira ne’ebé maka toma konta ba kazu Timor-Leste no Conocophilips nian kona ba kazu selu taxa nian, halo servisu lalos nune’e fo impaktu Timor-Leste lakon iha kazu 16.
“Ami (veteranus-red) ejiji ba Estadu atu halo reforma imediatamente iha area seitor justisa, foti medida lalais ba juis hirak ne’ebé maka halo desizaun ne’ebé lalos hasoru Estadu, Estadu halo investigasaun Independente atu hatene tambasa maka Estadu Timor-Leste lakon iha kazu sanulu resin nen (16), suspende no investiga juis sira ne’ebé involve iha prosesu judisiariu ba kazu refere,”Kordenador VKLN, Vasco ‘Criado’ da Gama deklara liu husi konferensia ba imprensa iha edifisiu Museum da Rezistensia, Kuarta (29/10).
Veteranus sira nota katak, kona ba kazu selu taxa nian iha kazu tolu (3) maka juis nain (3) (juis ida husi Portugal no nain rua (2) seluk Timor-oan halo prosesu maibe wainhira hatun desizaun ba kazu 3 ne’e, nia dokumentus deit, desizaun copy-paste. Tamba ne’e Veteranus sira konsidera katak Juis nain 3 ne’e halo konkalikon hodi kondena Estadu.
“Desizaun copy-paste komprova katak juis nain tolu halo konkalikon hodi kondena Estadu. Ami kondena no la simu atetude hirak ne’e. Juis ida-idak tenki hala’o nia kna’ar ho independente la’os copy paste,”dehan nia.
Husi desizaun copy paste ne’e, Veteranus sira konsidera katak, juis sira la profesional no juis nain 3 ne’e halo ona krime hasoru nasaun Repúblika Demokratika Timor-Leste (RDTL).
Veteranus sira mós lamenta ka la satisfeitu ho servisu Ministerio Público (MP) nian tamba hanesan instituisaun ida ne’ebé maka atu defende Estadu iha Tribunal maibe bainhira aprezenta kontestasaun, MP kahur fali dokuementus sira husi kazu projeitu ida nian ba fali kazu projeitu seluk nian, nune’e veteranus sira deskonfia katak pesoal sira iha MP laiha responsabilidade no la profesional.
“Iha kazu lima (5) ne’ebé Kompaña balu hasoru Estadu kona ba taxa/impostu, Ministerio Público hatama dokumentus ho pajina liu atus hat (400), maibe alen de hatama dokuemntus rungu-ranga (la organiza halo didiak), Ministerio Público hatama dokumentus sala. Dokumentus hatama kazu kompaña ida, nia konteudu argumentu kazu seluk nian,”esplika Kordenador VKLN ne’e.
Husi problema ne’e Veteranus sira konsidera katak, ne’e hanesan traisaun bo’ot ida maka MP no Tribunal halo hasoru Estadu. Hahalok ne’e hatudu katak prokurador no Juis sira la hala’o servisu ho honestidade, maibe ho intensaun atu hetan benefisiu balun ba sira nia interese liu husi kazu hirak ne’e.
“Ami labele konsidera hanesan fallansu, maibe ne’e hahalok ida estruturadu no sistematizadu tamba iha asesor Internasional iha Ministeriu Público no ho Juis iha Tribunal ne’ebé iha dever atu haree no estuda didiak molok foti desizaun. Asesor Internasional sira labele tau em kauza, ami nia interese nasional,”nia afirma.
Husi hahalok sira ne’e Veteranus sira fo hanoin katak, veteranus durante tinan 24 nia laran Timor-oan luta ba lia los. Durante tinan 24 nia laran Timor-oan buka justisa tuir padraun Internasional. Durante tinan 24 nia laran Timor-oan fakar ran, terus, susar, no funu nain sira ruin naklekar iha teritoriu tomak hodi harii nasaun.
Tamba ne’e, Veteranus sira sei la permite se-se deit maka iha intensaun hakarak hanesan fali Timor-oan nu’udar nasaun soberania, Timor-oan prontu dala ida tan defende soberania no Integridade nasional.
“Veteranos no Kombatentes Libertasaun Nasional apela ba Timor-oan hotu-hotu tenki neon nain, matan moris hodi haree tuir nafatin ba lala’ok individu balu iha Instituisaun estadu hanesan Tribunal Distritu Dili, ne’ebé hala’o servisu la ho imparsialidade, la honestu, inkapasidade no la profesional,”deklara Veteranus sira.
Ba oin, veteranus sira sei metin liu tan, hamutuk nafatin hodi defende riku soin tamba ne’e futuru ba oan no bei oan sira nian. Hamutuk hodi defende lia loos, funu hasoru naok ten no bobardor sira, tamba ukun-an ne’e Timor-oan hetan hodi ran no ruin maka nasaun ne’e livre no independente.
“O hakat liu ami nia mate maka o hasai ami nian riku no soin,”esklarese Kordenador VKLN, Vasco ‘Criado’ da Gama.
Konferensia imprensa ne’e partisipa masimu husi veteranu sira husi reziaun tomak, lider rejiaun Primeiru (I), Segundu (II), Terseiru (III) no Kuatru (IV) no rejiaun autonomia Oecusse inklui mós Organização Popular Mulher de Timor (OPMT) no Organização Mulher Timor (OMT).dgx
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template