Headlines News :
Home » , , , , , , , » FRETILIN Nia Analiza Ba Situasaun Aktual TL

FRETILIN Nia Analiza Ba Situasaun Aktual TL

Written By Timor News Online on 11/04/2014 | 8:37 PM



Komisaun Polítika Nasionál (KPN) FRETILIN, Segunda (03/11) deklara prontu atu defende estadu direitu demokrátiku no Lei sira RDTL nian.
Nota komunikadu imprensa ne’ebé redasaun Jornal Nacional Diário simu, Tersa (04/11), husi KPN-FRETILIN ne’e haktuir katak, deklarasaun polítika ne’e fó sai depois halibur extraordinariamente ho partisipasaun deputadu sira bankada FRETILIN nian iha Parlamentu Nasionál (PN), hodi diskuti konaba situasaun polítiku-institusionál aktual iha Timor-Leste (TL) no halo deklarasaun katak, FRETILIN prontu defende estadu direitu demokrátiku no Lei sira RDTL nian.
Dokumentu informasaun ne’e mós hatutan katak, FRETILIN prontu atu kontribui nafatin bá harii kbit Instituisaun sira Estadu nian, liu-liu, Órgaun Soberanía sira.
“Ninia pozisaun momoos katak prinsípiu solidariedade no interdependénsia bá funsionamentu órgaun sira-nian tenke komprende iha ámbitu prinsípiu respeitu bá knar órgaun ida-idak nian, nu’udar hakerek iha Konstituisaun RDTL nian”, nota imprensa ne’e esplika.
Tuir dokumentu informasaun ba média ne’e, órgaun polítiku no lejislativu bá soberanía, iha sira-nia aktus, sira tenke tau prioridade liután bá hakbiit sira-nia kapasidade rasik no bá produsaun Diploma Legál sira no kuadru reguladór. Sira nia aktu tenke mós hatudu preokupasaun atu bele garante kuadru jurídiku ida hó armonía, momoos no lasusar ema atu interpreta, administrasaun ida kompetente ne’ebé iha grau aas bá justisa no Governasaun Di’ak.
“Prezidenti Repúblika tenke kaer bá nia knar nu’udar garante bá Konstituisaun no bá instituisaun Estadu sira-nia funsionamentu normál no la permiti atu iha injerénsia hosi Órgaun ruma bá Órgaun sira seluk nia knaar”, komunikadu ne’e hateten tan.
Komunikadu imprensa ne’e hateten tan, KPN-FRETILIN mós husu ba Tribunál sira, Ministériu Públiku, sistema tomak ne’ebé kontribui bá hala’o funsaun judisiáriu sira iha direitu atu eziji husi órgaun polítiku sira soberanía nian, meiu no rekursu ne’ebé sira presiza atu sira bele hala’o sira-nia knar hó independénsia no kompeténsia.
“Tribunál sira no Ministériu Públiku, sira idadak iha sira rasik nia konsellu Superiór atubele atúa, tuir sira rasik nia inisiativa, ka liu hosi reerimentu ruma mai hosi Órgaun  a sidadaun sira, atubele halo inspesaun ka auditoria kona-ba funsionamentu internu no atu bele foti medida disiplinár loloos hodi bele kurriji buat ruma ne’ebé la loos”, nota ba imprensa ne’e dehan tan.
Nota informasaun ne’e mós haklaken katak, KPN-FRETILIN hanoin katak, buat frajilidade institusionál ne’e, realidade ida ne’ebé afeta instituisaun hotu-hotu.
“Nune’e, ita labele hakarak atu sistema judisiáriu sai nu’udar illa (Bah. Ind: ka “pulau”/”nusa”) ida iha Tasi-Boot bá inoperánsia no inérsia no má-jestaun bara-barak no abuzu podér ne’ebé, ikusmai, hamosu danu polítiku, ekonómiku no sosiál bá país tomak no hela arbiru ho sasán públiku”, katak komunikadu imprensa ne’e.
Nota imprensa ne’e hateten tan, FRETILIN mós konsidera urjenti ba governu atu prioriza re-estruturasaun no reajustamentu bá instituisaun públika sira tomak, hodi harii polítika bá formasaun no bá hakbiit rekursu umanu sira no instituisaun sira rasik.
 ”Konsidera katak tenke ona aprova rejimentu foun ida bá Parlamentu Nasionál atu nia bele auténtiu loloos, reprezentativu bá povu no Nasaun nia hakarak, ne’ebé independenti duni”, katak nota imprensa ne’e.
Dokumentu informasaun ne’e hatutan katak, FRETILIN konsidera mós urjenti remodelasaun bá Governu atu nia bele hakmán liután no kompetente liután atu hala’o ezekusaun Planu no Programa sira atubele serbí di’ak liután.
“Tribunál sira, Ministériu Públiku no instituisaun sira hotu ne’ebé hala’o hamutuk funsaun Judisiária, FRETILIN fiar katak, setór importante ne’ebé presiza hetan atensaun maka’as liután husi Estadu tomak, atubele efikáz liután bainhira hala’o ninia knaar sira, hakruk lós de’it bá Konstituisaun no bá Lei sira no mós bá profisionál sira-nia neon. Labele iha órgaun soberanía ida ne’ebé mak hanoin katak nia iha direitu atu intervén iha setór ne’e nia organizasaun interna, liu-liu, Tribunál no Ministériu Públiku sira-nian, tamba ida-ne’e bele kontribui atu kria risku ba sistema polítiku vejente no estadu direitu demokrátiku”, katak nota imprensa ne’e.
Nune’e FRETLIN:
Liu husi deklarasaun polítika ne’e, katak nota imprensa ne’e, FRETILIn mós halo apelu bá Prezidenti Repúblika atu kaer bá ninia knar nu’udar garante bá Konstituisaun no bá funsionamentu normal órgaun soberanía no Instituisaun Estadu sira tomak nian. Inklui eziji bá Parlamentu Nasionál atu lalika tenta delibera tan kona-ba kestaun sira ne’ebé laíha buat ruma ho sira-nia knaar hakerek iha Konstituisaun.
“Bá Governu no bá Primeiru-Ministru atu labele hakat liu baliza bá sira-nia kompeténsia atu fó apoiu bá Setór Justisa no atu evita halo desizaun ne’ebé kontribui de’it atu hasusar profisionál sira justisa nian no hamosu konflitu institusionál”, nota imprensa ne’e hateten tan.*/ixo
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template