Headlines News :
Home » , , , , , , , , » Futu Lia Halo Abortu, Enfermeiru HNGV Hatan Iha Tribunal

Futu Lia Halo Abortu, Enfermeiru HNGV Hatan Iha Tribunal

Written By Timor News Online on 11/20/2014 | 8:15 PM



Graziela Cuifa Corezão, ohin loron, arepende los ho nia moris, tanba mane ne’ebe mak nia saran nia domin no isin lolon tomak la responsabiliza ba relasaun “domin” ne’ebe mak sira nain rua halo.
Ramos da Costa, nudar mane ida ne’e Graziela hadomi liu iha nia moris tomak. Buat hotu Graziela bele halo para hatudu nia domin boot ba Ramos, to’o Graziela la hanoin dook hodi intrega nia “pureza” ba Ramos.
Ironia liu, domin ne’ebe mak Graziela fo ba Ramos bele dehan, basa iha liman sorin deit alias Ramos hakarak buka gostu deit.
Graziela ho Ramos matan monu ba malu iha tinan 2009. Momentu neba, Graziela eskola iha banku Secundaria. Sira nain rua lao ba malu no lori malu to’o Graziela tau fiar ba Ramos hodi entrega nia futar an tomak ba Ramos hodi halo relasaun fen-laen.
Ho neon sala ne’e, Graziela informa hikas kazu ne’e ba nia familia hodi hamutuk bele prosesa problema kontra humanidade ne’e ba justisa legal. Nune’e, Kinta (20/11), Tribunal Distrital Dili (TDD) aprezenta Ramos, Graziela ho Infermeiru João Freitas.
Ho relasaun fen-laen ne’ebe Ramos ho Graziela halo ne’e fo fuan duni. Nune’e,              iha Outubru 2009, Graziela isIn rua. Nune’e, Graziela fo hatene ba Ramos kona-ba nia kondisaun ne’e. Mas, sorte at tebes. novidade ksolok ne’e la hetan resposta diak husi Ramos, tanba Ramos haruka no obriga tenke halo abortus tiha kosok oan ne’e ho razaun katak, sira nain rua sei idade ki’ik no seidauk prontu atu sai aman ba bebe ne’e.
La hanoin narok, Ramos buka meus oi-oin hotu atu Graziela bele halo abortu ba kosok oan sala laek ne’e. Ho nune’e, Ramos kontaktu ba infermeiru João Freitas, atu bele ajuda halo abortu.
Oportunidade kmanek ne’e João Freitas nudar infermeiru tau kedas nia folin US$ 1.000 para fasilita halo abortus, maibe Ramos nia osan la to’o entaun selu deit US$ 5.00.
Ramos ho Infermeiru João Freitas lia ida tiha, lori Graziela ba iha hotel Sebastião hodi sona ai-moruk dala ida iha Graziela nia liman no hatama mangeira ba iha Graziela nia oin lulik.
Esforsu halo abortu ne’e durante loron 12 nia laran. Ne’ebe, lor-loron, Infermeiru João Freitas tenke sona aimoruk ba Graziela nia isin. Mas, durante sona to’o dala 12 ne’e laos ona iha hotel Sebastião, maibe iha deit ona kareta laran.
Iha loron ikus ne’e, Infermeiru João Freitas hatama tan mangeira dala ida ba Graziela nia oin lulik ne’ebe rezulta abortus duni no ran kafuak boot ne’ebe sai mai ne’e sira tau deit iha plastiku ida hodi ba hakoi iha Rai Kotu, Comoro, Dili.
Graziela sente arepende no sala boot tanba la espera mane ne’ebe nia hadomi tebes bele hanoin at no obriga tenke “oho” tiha kosok oan inosenti ne’e.
Iha kazu “abortus” ne’e, Ministeriu Publiku (MP) notifika Ramos da Costa ho Infermeiru João Freitas hanesan arguidu no Graziela nudar lezada.
MP akuza Ramos ho Infermeiru João Freitas komete krime Interupsaun Gravidas tuir artigo 142 kodigu penal. Arguido Ramos da Costa nudar jogadores ekipa nasional Timor Leste no Infermeiru João Freitas, halao knar professional iha Hospital Nasional Guido Valadares (HNGV).
Hafoin rona tiha akuzasaun MP ne’e, Tribunal husu ba arguido nain rua (Ramos ho João-red)) katak, akuzasaun ne’e los ga lae, maibe arguido nain rua ne’e deklara ba tribunal katak akuzasaun sira ne’e lalos no falsu.
“Hau hakarak hateten katak, akuzasaun sira ne’e hau laiha konhesementu, sira nain rua deit mos namora hau lahatene no hau lakonhese arguido pior liu tan mak nia namorada,” deklara Arguido João Freitas ba Tribunal.
Iha fatin hanesan, Arguido Ramos mos konfesa ba Tribunal katak, akuzasaun ne’e balun los no balun sala, los maka sira nain rua namora malu duni iha tinan 2009.
“Ami rua namora duni iha tinan 2009, durante ne’e ami rua sempre halo relasaun seksual ka toba hamutuk. Liu tiha ne’e nia (Graziela-red) telefone mai hau katak nia isin rua, hau rona tiha ne’e hau dehan katak hanesan ne’e ona ita atu halo hanusa los no nia dehan katak nia tauk, maibe hau dehan labuat ida husik ona ba labarik ne’e mai ita nia inan aman mak hare deit,” dehan Argudo Ramos.
Jogador ekipa Nasional TL ne’e hatutan, hafoin rona tiha ne’e lezada husu osan hamutuk US$ 5.00, momentu ne’e arguido mos tanba sai ba joga iha estranjeiro entaun iha osan oitoan ne’ebe fo deit ba nia namorada ona, maibe nia rasik lahatene katak osan ne’e atu halo saida.
Durante lezada isin rua, arguido no lezada la fo hatene sira nain rua nia familia li-liu inan aman, tanba tauk. Hafoin ne’e liu tiha loron hirak nia laran maka arguido rona dehan lezada abortus tiha ona, maibe iha akuzasaun katak arguido mak obriga lezada abortus, iha fali deklarasaun arguido nian nega total, pior liu tan maka arguido Ramos laiha konhesementu kona ba aimoruk at ne’ebe mak fo ba lezada.
“Ami nain rua namora duni iha tinan 2009, iha ne’eba hau isin rua tiha tanba hau ba leno iha klinika osan mean rejultadu hau isin rua fulan rua ona, ho ida ne’e hau kontaktu hau nia doben kona ba ne’e, maibe nia dehan tenke halo abortus tanba tauk inan aman, durante ne’e nia fo aimoruk hau hemu no fo rujak hau han, depois dehan hau katak ami atu ba hasoru doutor ida mak arguido João duni, osan US$. 5.00 ne’e fo kedas iha hau nia oin,” Graziela klonta tuir ho matawen.
Graziela ho idade 23 ne’e konta tan katak, durante ne’e nia namoradu lori ema ba kaer nia kabun no mos fo aimoruk, iha ne’eba nia halo tuir deit saida mak ninia namoradu dehan tanba hadomi tebes.
Lezada dehan katak arguido João ho Ramos hodi duni nia ba iha Hotel Sebastião, to’o iha ne’eba arguido João sona dala ida iha lezada nia liman halo lezada desmaia no toba kedas durante minutu 30 nia laran.
Wainhira hader mai Graziela hare tiha ona mangeira ho plastik ida iha lezada nia oin luliok, lezada hader tanba sente moras, mangeira ne’e doutor monta ba iha lezada nia oin lulik kuaze loron sanulu resin rua nia laran to’o rezultadu ikus abortus.
Kazu ne’e rejistu iha tribunal ho numeru prosesu 602/2014/TDD ne’ebe prejide husi Juis Kolektivo kompostu husi prezidente Juisa Jumiati Freitas akompanha husi juis adjuntu José Maria Araujo ho Antoninho do Carmo, Ministeriu Publiku reprezenta husi prokuradora Lidia Soares no arguido nain rua hetan asistensia legal husi defensor publiku Marçal Makarinhas. Julgamentu ba kazu ne’e kontinua fali Sesta ohin (21/11) hodi rona deklarasaun husi testamunha. may
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template