Headlines News :
Home » , , , , , , , , » Kazu ConocoPhillips, TL Sei Manan ‘Tipis’

Kazu ConocoPhillips, TL Sei Manan ‘Tipis’

Written By Timor News Online on 11/04/2014 | 8:59 PM



Deputadu bankada FRETILIN, Estanislau Aleixo da Silva fó komentáriu katak, kazu impostu ne’ebé dadauk ne’e la’o hela iha tribunál arbitrajen Singapura, Timor Leste sei manan kazu balun deit no balun sei lakon.
Maibé reprezentante povu ne’e husu ba Timor-oan hotu atu labele duun malu, no tenki tau hamutuk hanoin hodi infrenta kazu ida ne’e.
“Ha’u lakohi du’un ba ema ida, ha’u hanoin katak Governu se maka kaer ukun, nia maka iha responsabilidade tomak, atu haree kona-ba prosesu sira ne’e. Ha’u lahatene tansa maka iha akumulasaun ba buat sira ne’e hotu to’o agora, derepenti deit, atravesa kazu bar-barak, depois ita hanoin atu manan. Podeser ke ita bele manan kazu balun, maibé ha’u la fiar ke ita atu manan kazu hot-hotu,” informa Estanislau da Silva ba JN-Diário Tersa (04/11) iha Parlamentu Nasionál.
Ida ne’e tenki husu ba Governu, tanba saida maka Timor Leste lakon, tanba kuandu lori kazu ida ba tribunal, parte rua ne’e, ida-idak sei aprezenta nia argumentu.
“ConocoPhillips sira mai investe iha ita nia rai para explora ita nia rikusoin, maibé sira laselu taxa. Maibé ha’u lahatene, tanbasa maka to’o agora Governu foin hateten katak sira laselu taxa. Se sira laselu taxa, entaun se maka responsabiliza kobransa ba taxa sira ne’e, Governu maka responsabiliza. Se kompañia laselu taxa to’o agora, entun buat ruma sala iha servisu Governu nian,”dehan Estanislau.
Kuandu hanesan ne’e ona no Governu hakarak lori sira ba tribunal, entaun sira mos defende sira nia an.
“Se ita la manan, entaun buat ruma maka ita halo sala ona, maka sira hodi manan ne’e karik. Tanba ne’e maka hau dehan, diak liu hare didiak ba, ita lalika du’un malu,”katak Estanislau.
Diak liu agora ne’e, hare fila-fali prosesu ne’ebé maka hatama ona ba iha tribunal, para depois juiz sira ne’ebé hola desizaun, bele fó mos razaun mai Timor Leste.
Tanba prosesu tribunal ne’e hanesan ne’e, kuandu husi parte ida la konsege aprezenta argumentu forte, entaun ida fali bele manan.
“Tanba ne’e hau hanoin, ita tenki hare fila-fali kazu ne’e didiak, ita labele bolu naran ba ema arbiru, tu’ur ho ulun malirin, halo fali revizaun ba kazu sira ne’e atu aprezenta, tanba hau hanoin se iha tempu atu Governu bele aprezenta fali argumentu foun ruma,”esplika Estanislau.
Maibé buat ida aserta maka ne’e, labele hanoin katak Timor Leste mesak maka atu manan, tanba bainhira hatama kazu ruma ba tribunal, ema mos sei ba defende sira nia an, no juiz sira maka sei sukat.
Iha fatin hanesan, Deputadu Adriano João husi bankada PD mos afirma katak, Prezidente da Republika Taur Matan Ruak fiar katak Timor Lese sei manan, tanba ho unidade ne’ebé maka órgaun soberanu hot-hotu halo dadauk ne’e.
Adriano hatutan, PR Taur fiar Timor Leste atu manan iha rezultadu ikus, tanba dadauk ne’e kom ponente hot-hotu akompaña situasaun ne’e iha tribunal.
Antes ne’e, Prezidente da Republika Taur Matan Ruak fiar katak, kazu Timor Leste ho ConocoPhillips ne’ebe dadauk ne’e tama iha tribunal arbitrazem Singapore, Timor Leste lakon iha kazu balun, maibé sei manan iha rezultadu ikus, ne’ebé sai hanesan manan bo’ot.tap
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template