Headlines News :
Home » , , , , , » MNEK Interinu Simu Bainaka Husi EUA no India

MNEK Interinu Simu Bainaka Husi EUA no India

Written By Timor News Online on 11/03/2014 | 8:52 PM



Ministru Negósiu Estranjeiru no Koperasaun Interinu, Constâncio Pinto hala’o sorumutu ho Katherine Duffy Dueholm, Enkaregada Negósiu husi Embaixada Estadus Unidus Amerika no Embaixador Extraordinariu no Plenipotensiariu India nian.
Nota Komunikadu imprensa ne’ebé redasaun Jornal Nacional Diário simu husi Gabinete relasaun públika Ministériu Negósius Estranjeirus (MNEK), Segunda (03/11), informa katak, sorumutu ne’e hala’o iha 29 Outubru 2014, iha Ministériu Negósiu Estranjeiru no Koperasaun, Praia dos Coqueiros Dili.
Nota imprensa ne’e haktuir katak, konaba sorumutu ho enkaregadu Negósiu Estadus Unidus Amerika ne’e, parte rua diskuti konaba kestaun sira ne’ebé iha relasaun ho koperasaun bilateral entre rai rua ne’e, mak hanesan kordenasaun asistensia bilateral, resolusaun hirak ne’ebé parte Estadus Unidus Amerika husu atu Timor-Leste bele apoiu iha Assemblia Jeral Nasõens Unidas nian. Kestaun importasaun ho exportasaun, koperasaun iha área seguransa, apoiu Estadus Unidus ba Timor-Leste nian kandidatura ba ASEAN, kontribuisaun Timor-Leste nian iha prosesu kombate hasoru moras Ebola, assuntu konaba ofisial ligasaun ba fronteira no kestaun sidadã Amerikana ne’ebé oras ne’e autoridade Timor-Leste prosesa hela relasiona ho alegasaun ba kazu droga nian.
“Bazikamente, reuniaun ohin ne’e para atu atualiza informasaun ba malu konaba ita nian koperasaun bilateral nomos Estadus Unidus Amerika nian pedidu ba Timor-Leste hodi fo apoiu ba resolusaun hirak ne’ebé atu diskute iha Nasõens Unidas,” Constâncio Pinto haktuir iha komunikadu ne’e.
Iha sorumutu ne’e mós, Estadus Unidus Amerika liu husi ninia Enkaregada Negósiu expresa sira nian prontidaun atu fo’o apoiu ba prosesu adezaun Timor-Leste ba ASEAN liu husi asistensia téknika konaba assuntu ASEAN ne’ebé sei foka liu iha área ekonomia nian.
“Relasiona ho ita nian kandidatura ba ASEAN nian ne’e, Amerika pronto atu fo apoiu ba iha area agrikultura, liu-liu konaba kontrolu kualidade ai-han no hijeniku. Hau hanoin ida ne’e diak, tamba se ita kumpre ona kriteriu sira ne’ebé iha, ita bele mos exporta ona sasan ba merkadu ASEAN nian no merkadu sira seluk. Ne’ebé, hau hanoin parte ida pozitivu tebes”, tenik Constâncio Pinto liu husi nota imprensa.
Marka mos prezensa iha reuniaun ne’e mak John H. Seong, CPA, Diretor Misaun USAID iha Timor-Leste ho Vanio Florival, Diretor Nasional ba Amerika nian.
Sorumutu ho Embaixador Extraordinariu no Plenipotensiariu India nian
iha loron ne’ebé hanesan mós, Ministru Negósiu Estranjeiru no Koperasaun Interinu, Constâncio Pinto, hala’o mós sorumutu ho delegasaun India nian ne’ebé kompostu husi Embaixador Extraordinariu no Plenipotensiariu India ba Timor-Leste, Gurjit Singh ho grupu emprezariu sira husi India ne’ebé konsentra iha area explorasaun mineira, industria no konstrusaun nian.
“Reuniaun ida ne’e hanesan segimentu ba visita ne’ebé mak Embaixador India nian halo uluk tiha ona. Foin dadaun ne’e, ami nain rua enkontru mos iha Bali, durante reuniaun Bali Democracy Forum. Iha ne’ebá, ami koalia konaba assuntu tolu: ida mak visita delegasaun emprezariu Indianu sira mai Timor-Leste, assuntu ida mak konaba estabelesimentu sentru IT nian iha Dili no terseiru konaba sira nian hakarak atu hetan ema ida ba sira nian Konsul Honorariu iha Timor-Leste. Hau hanoin ida ne’e inisiativa ida diak teb-tebes para atu bele hametin ita nian koperasaun ho India,” haktuir Constâncio Pinto.
Constâncio Pinto hatutan katak Governu India iha interese hakarak habelar liu tan koperasaun ho Timor-Leste. Governu India mos hakarak fo tratamentu espesial ba Timor-Leste nian produtu sira ne’ebé atu tama ba India ho kondisaun free tariff ka la kona taxa.
Akompanha Embaixador Extraordinariu no Plenipotensiariu, Gurjit Singh iha visita ida ne’e mak investor sira ne’ebé mai husi kompañia bo’ot ne’ebé involve iha konstrusaun ba kamiñu ferro, aeroporto, explorasaun mineiru no agrikultura.*/ixo
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template