Headlines News :
Home » , , , , , , , , » Movimentasaun Droga Sei Maka’as Iha TL

Movimentasaun Droga Sei Maka’as Iha TL

Written By Timor News Online on 11/04/2014 | 8:48 PM

Movimentasaun droga sei sirkula maka’as iha Timor Leste, wainhira tribunal la kondena ema sira ne’ebe involve direita ou indireita ba prosesu ne’e.
Direktur Judicial System Monitoring Programme (JSMP), Luis de Oliveira Sampaio esplika, iha prosesu normal tribunal nian katak, se lakonkorda ho desizaun tribunal primeira instansia, bele hasae rekursu ba tribunal rekursu hodi avaliasaun no apresiasaun ba faktus sira.
Iha kazu eis komandante investigasaun kriminal, Calisto Gonzaga nian ne’e involve ema bot ruma ne’ebe fo orientasaun ba nia atu hala’o. Nune’e iha momentu desizaun tribuanal primeira instansia, kondenadu husu atu bolu sira ne’ebe iha konesementu no orienta nia atu halo, maibe tribunal lakonsidera. Tanba ne’e mak sai faktor fundamental ba tribunal rekursu atu anula nia prosesu.
“Ida ne’e bele sai motivu atu droga tama TL ho fasil, tanba tribunal lakonsege kondena ema sira ne’ebe mak involve direita ou indireita iha prosesu ne’e. iha desizaun tribunal primeira instansia kondenadu husu atu bolu ema sira ne’ebe iha poder, maibe tribunal labolu,” dehan Luis de Oliveira ba JN-Diario iha nia kna’ar fatin foin lalais ne’e.
Nia husu atu tribunal fo desizaun ne’ebe justu ba kazu krimi organizadu refere liu husi bolu sira ne’ebe involve direita, so ida ne’e mak bele fo justisa ida justu.
Defensor publiku jeral, dr. Sergio da Costa Hornai sekunda, kazu krimi organizadu ne’e komesa makas.
TL nudar estadu ida ne’ebe ita bele hatete iha potensia ba ema atu tama hodi bele halo sira nia aktividades ilegal sira.
“Ho ita nia failansu ne’ebe ita hasoru entaun iha posibilidade bot para atu mosu krimi ne’e makas liu tan,” tenik Dr. Sergio.
Antes ne’e, komandante Polisia Imigrasaun, superintendenti asistente, José da Costa afirma, polisia imigrasaun sempre halo kontrolu ba dokumentus tama sai iha fronteira, aktividade sidadaun estranjeiru no hela fatin, maibe atu detekta droga ne’e laos servisu imigrasaun nian.
Tantu Direktur Jeral Alfandega, Jose Antonio F. Abilio afirma, falta fasilidade no ekipamentus ne’ebe regurozu atu detekta drogas ne’ebe tama iha portu Dili ne’e mak sai difikuldade bot ba alfandega, mesmu alfandega iha makina exrey atu detekta maibe susar.
“Sira aproveita TL nia siguransa ne’ebe seidauk diak hodi sai hanesan fatin transzitu hodi lori droga ba iha nasaun vijinhu sira,”dehan nia.
Parte alfandega mos hato’o ona proposta ba ministeriu kompetente atu sosa ekipamentus regurozu, nune’e bele ajuda funsionariu sira halao servisu, tanba aktividade krimi organizadu ne’e bem organizadu tebes, tanba nia net work ne’e makas, presiza tekniku ne’ebe iha kapasidade sufisiente atu detekta droga sira ne’e.
Nia kontinua, alfandega esforsu an hodi servisu hamutuk ho parte polisia Imigarasaun hodi antisipa sirkulasaun drogas iha rai laran.nty
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template