Headlines News :

Ohin Juiz Internasional Tenki Sai Husi TL

Written By Timor News Online on 11/06/2014 | 2:34 PM



Tuir rezolusaun Konsellu Ministru nian nebe fo sai iha Segunda (3/11) liu ba hodi fo prazu oras 48 ba juiz, prokurador no assesor internasional atu sai husi Timor Leste nee, monu iha Kinta (6/11) ohin.
Rezolusaun governo nian nee publika ona iha Jornal da Republika, fo sai ona katak iha 48 oras nian laran sei hasai obrigatoriu juizes, prokuradores no asesor internasionais ne’ebe maioria mai husi nasaun CPLP.
Kontiudu rezolusaun ne’e diriji direitamente ba juiz nain lima, Prokurador nain rua no asesor internasional ida. Juiz sira nee mak, juiz Cida Orlando de Melo Pinto (Portugal), Julio Gantes (Portugal), Eduardo Neves (Portugal), Pedro Miguel Figueiredo (Portugal) no juiz Carlos Camara (Portugal).
Prokurador nain rua nee maka, Luis Landim (Cabo Verde) no Gloria Alves (Portugal). Asesor Internasila ida mak, Jose Pinto (Portugal) nebe durante fo assesoria legal ba Komisaun Anti Korupsaun (KAK).
Juis, prokurador no asesor internasional nebe mensiona iha leten nee, tuir rezolusaun governu nian, tenki sai husi Timor Leste iha Kinta feira ohin.
“Juis Julio Gantes ema Portugues ne’ebe nia naran tama iha rezolusaun, governu fo tiha ona oras 48 ba nia atu sai husi TL. Iha tan rezolusaun ida ne’ebe hatete, aban (ohin,red) juis internasional tenki sai husi TL,” dehan advogado, Paul Remedios ba JN-Diario, Kuarta (5/11) iha nia kna’ar fatin P&R Lawfirm Advogados, Area Branca, Meti-Aut, Dili.
Nia mos konkorda ho argumentu Primeiru Ministru nian ne’ebe dehan, juiz internasional inkompetente no iresponsabilidade.
“Ita koalia bainhira ita haree sira viola lei, ita tenki kuriji,” dehan Dr. Paul Remedios.
Iha parte seluk, advogadu Manuel Tilman lakonkorda ho Governu nia desizaun, tanba durante ne’e juiz no prokurador internasional halao nia kna’ar ho diak, hasai desizaun ne’ebe justu no kompetente.
Ba nia, desizaun ne’e PM nian ne’e bele hakotu relasaun diak entre Timor ho Portugal liu-liu Timor agora lidera hela prezidensial CPLP ne’e enkomoda ita nia parseiru sira.
“Ba problema ne’e, konselhu superior Portugal nian anula tiha kontratu hotu ho Timor, ne’ebe ita duni sai ka laduni, sira kontratu hotu sira ba ona,”nia akresenta.
Juis Internasional Lahala’o Knar
Juis internasional sira ne’ebe mak Estadu Timor Leste halo kontratu hodi halao servisu iha Tribunal Distrital Dili (TDD), la halao ona sira nia knar no balun fila hikas ona ba sira nia rain.
Juis internasional sira ne’e “dezanima” tama servisu hodi kumpri desizaun Estadu Timor Leste nian ne’ebe hapara totalmente sira nia kontratu judisiariu nian liu husi rezolusaun ne’ebe mak hasai husi Parlamentu Nasional (PN) ho Governu, foin lalais ne’e.
“Iha loron rua ka tolu liu ba, Juis internasional sei mai iha Tribunal, mas agora sira la mai ona no tuir informasaun ne’ebe ami rona katak sira ba ona sira nia rain,” informa ofesial justisa ba JNDiario iha TDD, Kuarta (05/11).
Situasaun servisu iha TDD la’o normal hela, maibe movimentu juis internasional nian mak la hanesan ona bai-bain, tanba sira la marka ona prezensa no la kaer ona kazu julgamentu.   Juis Timor oan deit mak halao hela knar hodi halo prosesu julgamentu ba kazu sira mak ajenda ona iha TDD.
Ba situasaun ida ne’e, jornalista JNDiario tenta husu informasaun legal husi Juis Administrador Distritu Dili, Duarte Tilman, Ministru Justisa (MJ), Dionisio Soares Babo ho Vise Ministru MJ, Ivo Valente, maibe la fo komentariu tamba okupadu tebes ho servisu estadu nian. nty/may
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template