Headlines News :
Home » , , , , , , , , , , , » PM Xanana Husu PN Labele Hasai Imunidade Membru Governu

PM Xanana Husu PN Labele Hasai Imunidade Membru Governu

Written By Timor News Online on 11/06/2014 | 2:44 PM

Primeiru Ministru (PM), Kay Rala Xanana Gusmão, husu ba Parlamentu Nasional (PN) atu labele hasai imunidade membru Governu sira to’o mandatu Governu Bloku Koligasaun (GBK) remata.
Pedidu ne’e PM Xanana husu liu husi karta ofisial ne’ebé PM Xanana rasik haruka ba PN iha dia 22 fulan Outubro liu ba. Nune’e membru Governu atu ba hatan iha Tribunal karik hafoin mandatu remata iha 2017.
“Primeiru Ministru fo ninia pedidu mai Parlamentu karik bele halo akuzasaun ba membru Governu ne’e para atu ba Tribunal ne’e depois de mandatu hotu,”informa vice Prezidente Parlamentu Nasional (PN), Aderito Hugo da Costa ba jornalista iha PN, Kuarta (05/11).
Karta pedidu husi Primeiru Ministru ne’e oras ne’e dadauk iha meja Prezidente PN tamba ne’e meja PN sei halo diskusaun ho lideres bankada Partidus politikus iha Parlamentu Nasional.
Hafoin diskuti ho lideres bankada Partidus Politikus husi Partido Congresso Nacional de Reconstrucção Timorense (CNRT), Frente Revolusionario Timor-Leste Independente (FRETILIN), Partido Demokratico (PD) no Frente Mudanca, depois maka foti desizaun hamutuk liu husi plenaria.
“Pedidu iha Prezidente Parlamentu, meja Prezidente halo diskusaun ho lideres bankada sira, deputadu sira tamba desizaun iha Parlamentu ne’e desizaun kolektivu, la’os desizaun unipessoal,”dehan nia.
Ho pedidu ne’e iha tempu badak liu husi konferensia lideres bankada sei diskuti hodi haree ba pedidu ne’e.
Vice PN husi bankada CNRT ne’e hateten, pedidu no petisaun hotu, sidadaun hotu-hotu bele haruka ba Parlamentu, depois maka Parlamentu bele haree no deside pedidu ne’e.
Nia hatutan, PM Xanana mós bele haruka pedidu ba Parlamentu tamba hanesan Xefe Governu ne’ebé oras ne’e dadauk lidera hela membru Governu hamutuk nain 54.
Nune’e mós Virgilio da Costa Hornai husi bankada PD, hateten, ne’e tenki haree didiak tamba atu hasai imunidade ne’e tamba membru Governu ka Parlamentu komete iha kazu ruma, nune’e hasai para ba hatan iha Tribunal hanesan sidadaun bai-bain.
Tamba ne’e PM Xanana husu atu labele hasai imunidade membru Governu sira nian ne’e presiza haree didiak.
“Ida ne’e ha’u hanoin kestaun ida tenki haree didiak. Atu haree ba imunidade tamba haree ba buat ruma liu-liu aktu korupsaun ruma ne’ebé membru Governu ka Parlamentu komete ne’e obrigatoriu ita kumpri ba lei,”dehan Virgilio da Costa Hornai.
Prezidente Komisaun F, ne’ebé trata asuntu Saúde, Edukasaun, Kultura, Veteranus no Igualidade Jéneru ne’e dehan, Parlamentu sei haree didiak ba konsistensia hodi implementasaun lei sira. Tamba iha Estadu Direitu Demokratiku ne’e lei maka iha leten ne’e maka tenki haree didiak asuntu sira ne’e.
FRETILIN Kontra
Iha fatin hanesan deputadu husi bankada FRETILIN, Estanislau da Silva, afirma katak, partidu FRETILIN sei kontra pedidu PM Xanana nian ne’ebé maka husu Parlamentu atu labele hasai imunidade membru Governu nian to’o mandatu Kintu (V) Governu Konstitusional remata.
“Ami sei kontra levantamentu ida ne’e porque ne’e kontra ami nia prinsipiu,”dehan Estanislau da Silva.
Deputadu ne’e hatutan, FRETILIN bele kompromete iha buat hotu hodi apoiu ba Orsamentu Jeral Estadu (OJE) ba interese nasional maibe atu labele hasai imunidade membru Governu nian ne’e FRETILIN sei la kompromete.
Nia hatutan, FRETILIN sei la apoiu ba pedidu PM Xanana nian para labele hasai imunidade membru Governu sira nian tamba ne’e kontra prinspiu FRETILIN nian.
Desde uluk Governu FRETILIN nian, eis Primeiru Ministru (PM), Mari Alkatiri, halo remodelasaun hodi hasai nia membru Governu sira tamba ne’e ba pedidu ne’e FRETILIN sei la aseita.
“Ne’e populasaun sira mós dehan agora ne’e FRETILIN mós apoia ona labele hasai imunidade ne’e, FRETILIN mak Governu mós sira mós halo hanesan ne’e karik, lae FRETILIN uluk memebru Governu ne’ebé halo ladiak katuas Mari hasai, halo remodelasaun hasai sira,”dehan deputadu husi bankada FRETILIN ne’e.
Asesor PM La Komprende
Relasiona ho karta Primeiru Ministru (PM) Xanana nian ba PN ne’e, advogadu Manuel Tilman fo esplikasaun katak, analiza asesor jurídiku PM Xanana Gusmão ba artigu 114 ne’ebe sita iha karta ne’e lalos.
“Ha’u hanoin laos PM mak sala, mas asesor juridiku PM nian mak sala intepreta. Diak liu duni sai tiha,”dehan Manuel Tilman.
Iha konstitusaun RDTL, artigu 114 koalia kona ba imunidade membru governu, maibe latama iha prosesu Ministra Finansa (MF), Emilia Pires nian.
Artigu 114 hatete, laiha membru governu ida ne’ebe bele detidu ka sai dadur preju, ne’ebe la hetan autorizasaun husi Parlamentu Nasional, wainhira krime ne’e hetan prijaun ho pena superior tinan 2 no engflagante de leitu.
Tuir nia, kazu Ministra Emilia nian ne’e latama iha artigu refere, maibe tama fali iha artigu 113 numeru 1 konstitusaun RDTL.
Artigu 113 numeru 1 ne’e hatete, membru governu ne’ebe hetan akuzasaun definitivu ona katak, marka tiha ona data julgamentu, atu ba julga ho pena prijaun ne’ebe superior tinan 2 ba leten, tenki suspende, lapersiza parlamentu fo autorizasaun.
Ho nune’e, lei ne’e husu suspende automatiku, PM tenki suspende hodi kumpri arigu 113 numeru 1.
Akuzasaun Ministra Finanas (MF), Emilia Pires, ne’e tuir artigu kodigu penal 299 kona ba partisipasaun ekonomika no nia valor ne’e liu 10 mil. Se nune’e, pena minimu ne’ebe Ministra Emilia karik kondenadu atu hetan ne’e mak tinan 3 maximu 15, entaun lapersiza karta husi PM, tanba laserve ba Ministra Emilia.
“Suspende ka la suspende tenki ba julgamentu duni,”afirma nia.
Maibe Tilman haktuir, kazu Emilia Pires nian diferente ho kazu Prezidente Parlamentu Nasional, Vicente Guterres, tanba nia membru PN entaun atu suspende laos tuir artigu konstituisaun RDTL, maibe tuir rejimentu PN nian.
“Rejimentu PN mak define bainhira mak bele hasai nia imunidade,”tenik nia.Dgx/nty
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template