Headlines News :
Home » , , , , » Povu Timor Osidental Hahalok Ladiak PR Taur Husu Povu TL Keta Banati Tuir

Povu Timor Osidental Hahalok Ladiak PR Taur Husu Povu TL Keta Banati Tuir

Written By Timor News Online on 11/18/2014 | 12:02 AM



Prezidente Repúblika (PR), Taur Matan Ruak, husu ba povu Timor-Leste (TL) iha fronteira atu labele banati tuir hahalok husi povu Timor Osidental nian ne’ebé tama teritoriu TL hodi oho animal arbiru deit basá ne’e hahalok ladiak.
PR Taur mos husu atu populasaun ne’ebé moris iha Fronteira hapara aktividades transaksaun ilegal.
PR Taur dehan kestaun ne’e hodi responde preokupasaun povu husi suku rua Taroman no Fatululik Sub-Distritu Fatululik, Distritu Covalima, ne’ebé husu ba Estadu no Governu atu aumenta Postu Polisia ida no personil seguransa Unidade Polisia Fronteira (UPF).
Ejijensia povu suku rua (2) nian ne’e, hato’o liu husi Administrador Sub-Distritu Fatululik, Vitorino do Carmo, wainhira hala’o dialogu ho Prezidente Repulika (PR), Taur Matan Ruak, Segunda (17/11).
“Situasaun seguransa iha liña fronteira entre seguransa parte nasaun rua, Timor-Leste ho Indonesia la’o kontroladu hela. Maibe povu husi Timor Osidental tama mai oho hela deit animal hanesan karau, kuda ho Bibi husi povu Fatululik nian, liu-liu iha Aldeia Aiton. Tanba ne’e ami husu ba Prezidente Republika atu hato’o ba Governu hodi aumenta tan postu seguransa UPF ida no rekursu UPF iha postu Fatululik ne’e,” hatete Administrador Sub Distritu Fatululik.
Administrador ne’e hatutan, sira nia akompañamentu ba iha postu seguransa UPF iha Fatuklulik, susar tebes ba personil tanba ne’e afeta ba aktividade operasaun nian iha fronteira.
“Iha loron ruma personil balun moras tiha no balun akompaña tiha komandante ba Dili entaun postu seguransa ne’e hela deit ema ida ka rua entaun atu halo kontrolu iha liña fronteira ne’e rekursu la to’o ho razaun ne’e mak husu atu aumenta tan pesoal membru UPF nian,”dehan Vitorino.
Vitorino hatutan, alen de kestaun seguransa ne’e husu mos ba governu atu tau atensaun ba kondisaun estrada ne’ebe la dun diak hodi fo impaktu ba movimentu transporte publiku ne’ebe halo ligasaun husi Sub Distritu Fatululik ba Fohorem Fatumea no mos ba Maucatar.
“Estrada ne’e importante tebes mai ami tanba ita haree hanesan agora ne’e, se kondisaun la diak mak maluk seguransa sira atu halo movimentu ba mai husi Fatululik ba Fohorem no fatin seluk hodi kontrola ema Indonesia tama sai ilegal mai area ita nian ne’e susar. Ho ne’e husu ba Prezidente atu relata hela ba Primeiru Ministru hodi tinan oin 2105 bele hadia,”hatete Vitorino.
Vitorino mos la haluha lori povu Fatululik tomak nia naran agredese ba prezensa PR ne’ebé hakat mai vizita fatin ida ne’e hodi rona povu tomak Fatululik nia susar no halerik.
Hatan ba preokupasaun sira ne’e, Prezidente Republika (PR), Taur Matan Ruak, senti kontenti mai vizita iha ne’e, no rona informasaun ne’ebe imi hato’o.
Kona ba kestaun seguransa liña fronteira, PR Taur dehan, maluk sira husi Indonesia (Timor Osidental) tama mai oho tiha animal sira ne’e, PR ho hamnasa hatete, keta imi mos oho sira nia animal mak sira mos tama mai oho imi nia animal ne’e karik.
“Kona ba asuntu ne’e husu imi povu hotu hakmatek, koopera ho UPF para rezolve problema sira ne’e. Maibe hakarak dehan ba imi katak relasaun amizade Timor-Leste ho Indonesia nian ne’e metin teb-tebes, la iha nasaun seluk iha mundu ne’ebé mak hatudu relasasaun diak hanesan ita ho Indonesia ne’e,”PR Taur hatete.
PR Taur hatutan, vizita ne’e hanesan prioridade ida define iha mandatu tinan 5. Ho ne’e PR halo esforsu hodi vizita fatin-fatin, atu rona povu nia susar ho terus saida mak infrenta hodi hato’o ba Governo.
“Ita agora ukun an ona, maibe servisu ita nian seidauk hotu tanba seidauk moris diak. Ho ne’ ha’u fiar so imi bele apoiu Prezidente, Governu hodi dezenvolve rai ida ne’e,”hatete PR Taur.
Ba preokupasaun povu nian kona ba kondisaun eskola, atu harii eskola secundariu iha Sub-Distritu Fatululik, be’e mos, elektrisidade, kampu futebol, PR Taur hatete, buat sira ne’e hotu sei lori tempu hodi rezolve no tempu ida sei rezolve hotu.
“Imi hotu hatene katak ita nia objektivu ne’e mak atu halo dezenvolvimentu ba rai ida ne’e, signifika dezenvolve ne’e hatudu katak ita la’o ba oin ne’e. imi tenki pasiensia hodi hein,”hatete PR Taur.
Iha fatin hanesan, Komandante UPF, Superintendente Asistente, João Sancho Pires, hatete, buat ne’ebe komunidade sira kestiona ne’e sira seidauk haree tanba koalia iha publiku ema bele koalia, maibe to’o agora seidauk kaer povu Timor Osidental ida.
“Fatin sira liña fronteira ne’e kontribuisaun husi UPF ho TNI oinsa kordenasaun iha fatin ida ne’eba. Ne’ebe se deit bele koalia maibe servisu mak tenki hatudu katak buat ne’e hanesan ne’e ka lae,”hatete Komandante UPF ne’e.
Tuir nia, kona ba atu aumenta postu unidade iha Fatuklulik ne’e fasil, maibe presiza tenki rekursu mak bele halo sasan hirak ne’e.
“Ita tau postu ida presiza buat ruma hanesan kondisaun uma no kondisaun toba, radiu komunikasaun no fasilidade seluk tan iha mak foin bele tau ema laos tur-tur tau deit ema ba, la’e,”hatete João.
To’o agora PNTL liu husi unidade UPF monta ona postu unidade iha liña fronteira hahú husi Citrana mai to’o Covalima ne’e hamutuk, postu 28 ho personil hamutuk 328.Nev
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template