Headlines News :
Home » , , , , , » Reuniaun Ministru Negósiu Estranjeiru CPLP, Fó Apoiu Ba Guiné-Bissau

Reuniaun Ministru Negósiu Estranjeiru CPLP, Fó Apoiu Ba Guiné-Bissau

Written By Timor News Online on 11/03/2014 | 9:00 PM



Ministru Estadu no Negósiu Estranjeiru no Koperasaun, José Luís Guterres hanesan Prezidenti ba Konsellu Ministru CPLP hamutuk ho Ministru Negósiu Estranjeiru CPLP sira reune iha Sesaun Estraordinária Konsellu Ministru ba dala XIII, iha Salaun Nobre Francisco Mendes, Palásiu Governu Guiné-Bissau, iha loron 29 Outubru 2014.
Nota Komunikadu imprensa ne’ebé redasaun Jornal Nacional Diário simu husi Gabinete relasaun públika MNEK nian, Segunda (3/11) ne’e haktuir katak, Ministru Negósiu Estranjeiru ida-ida aprezenta sira-nia avaliasaun kona-ba situasaun polítika, ekonómika no sosiál durante períodu pos-eleisaun lejislativa no prezidensiál iha Abril no Maiu 2014, hafoin país ne’e hasoru golpe estadu iha Abril 2012. Iha momentu hanesan, Ministru Negósiu Estranjeiru sira hamosu mós konsensu ida hodi fó apoiu finanseiru no enkoraja autoridade Guinense sira atu aselera prosesu normalizasaun polítika no sosiál ho hanoin atu bele hametin estabilidade no dezenvolvimentu iha Guiné-Bissau.
Iha ninia deklarasaun, Ministru Estadu no Negósiu Estranjeiru no Koperasaun, José Luís Guterres hanesan mós Prezidenti ba Konsellu Ministru CPLP ne’e esplika konaba objetivu sorumutu ne’e.
“Objetivu reuniaun Estraordinária Konsellu Ministru CPLP ba dala XIII deside kedas iha Díli. Governu Guiné-Bissau rasik mak husu tanba sira hakarak ho presenza ministru CPLP atu hatudu ba komunidade internasionál katak CPLP ne’e hamutuk ho povu Guiné-Bissau. Governu ida kaer ukun iha Guiné-Bissau, governu idake kredível i komunidade internasionál bele fó konfiansa tomak. Ne’ebé reuniaun ohin ne’e iha susesus ho presenza ministru sira nian ho reprezentante organizasoens internasionais i rejionais. Ha’u bele dehan katak reuniaun ne’e susesu. I komunikadu finál ne’ebé sai, reprezenta debate ne’ebé ami halao durante reuniaun ida ne’e i Timor-Leste hanesan kaer prezidénsia CPLP nian, ita-nia obrigasaun halo buat hot-hotu parake reuniaun Konsellu Ministru ne’e bele mós susesu,” hateten Ministru José Luis Guterres liu husi nota imprensa ne’e.
Hatan ba kestaun tamba sa mak Timor-Leste fó apoiu ba Guiné-Bissau, Ministru José Luis Guterres esplika katak, tanba Guiné-Bissau oras ne’e iha tempu difisil nia laran.
“Iha Dezembru wainhira Indonézia tama iha ita-nia rai-laran, ita-nia delegasaun ida ba iha Nova Iorke ne’ebé kompostu husi ita-nia eis-Prezidente Dotór José Ramos-Horta, Dotór Abílio Araújo, sira ba iha ne’ebá para reprezenta Timor-Leste. Governu na altura Fretilin harii iha 28 Novembru ba aprezenta keixa ba iha Konsellu Seguransa i semak fó apoiu boot tebetebes ba ita, na altura ne’e Guiné-Bissau. Guiné-Bissau mak fasilita ita-nia entrada iha Nasoens Unidas hanesan mós país selu-seluk afrikanus. Ne’ebé, se tempu difísil sira fó ba ita, sira ohin loron terus no susar, Timor-Leste hanesan povu idake jenerosu, povu idake hadomi i povu idake hatene rekoñese ema seluk nia apoiu, ita fó ba sira. Señór Primeiru-Ministru vizita dalabarak ona iha ne’e, hanesan mós eis-Primeiru-Ministru, Mari Alkatiri nomós Doutór Ramos Horta, nu’udar Reprezentante Espesiál Sekretáriu Jerál. Ita-nia komitmentu ne’e tanba saida, tanba hodi uluk kedas ema fó ba ita, i ita hanesan Timoroan, tuir ita-nia karáter, ita-nia kultura fó netik apoiu ba sira tanba sira ohin loron iha tempu ne’ebé difísil,” dehan komunikadu ne’e.
Nota imprensa ne’e esklarese katak, alénde marka presenza iha reuniaun ne’e, Ministru Negósiu Estranjeiru CPLP husi Estadu Membru sira, iha mós partisipante sira hanesan José Ramos-Horta, eis-Prezidente Timor-Leste, Miguel Trovoada, Reprezentante Espesiál Sekretáriu Jerál Nasoens Unidas ba Guiné-Bissau (UNIOGBIS), Reprezentante Uniaun Afrikana, Reprezentante Prezidente Komunidade Ekonómika Estadu Áfrika Osidentál (CEDEAO) no Reprezentante Uniaun Europeia.*/ixo
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template