Headlines News :
Home » , , » TNI-AU Duni Jet Ilegal Tama To’o Suai – KBRI Husu Deskulpa

TNI-AU Duni Jet Ilegal Tama To’o Suai – KBRI Husu Deskulpa

Written By Timor News Online on 11/04/2014 | 9:08 PM



Tentara Nasional Indonesia-Angkatan Udara (TNI-AU), Segunda (03/11), tuku 14:00 OTL, kaptura aviaun Jet illegal ida husi Saudi Arabia iha tasi Timor Distritu Covalima.
   “Iha duni aviaun ida mak atravesa iha area Indonesia ninian, depois Indonesia detekta Jet ida, liu husi Ujung Pandang konsege semo tama to’o Kupang, entaun sira halo komunikasaun ho aviaun refere, mas la iha resposta, entaun semo liu mai tasi Timor, entaun Indonesia duni tuir to Tasi Timor nune’e hodi fo tiru ameasa ba pilotu aviaun ne’e,”informa Segundu Komandante Geral Interino PNTL Superentendente Xefi, Faustino da Costa ba Jornalista iha Centru Formasaun Polisia Comoro, Tersa (04/11).
Hafoin kaptura tiha aviaun ne’e, Indonesia sira eskolta aviaun illegal ne’e fila ba NTT Indonesia lori loke prosesu investigasaun.
“Ita hetan informasaun husi adidu Polisia Republika Indonesia (POLRI) iha Embaisada Indonesia ba Timor Leste katak, suspeitu lori aviaun ne’e agora prosesu iha Kupang Indonesia,”tenik Faustino da Costa.
     Nia rezeita, informasaun ne’ebe maka lansa iha komunidade nia let maka dehan katak, Unidade Polisia Fronteira dehan tiru malu ho TNI iha lina fronteira.
“Hau hanoin informasaun ne’e la los, maibe TNI maka duni aviaun ne’e to iha tasi Timor, ida maka hau hatene,”responde Faustino da Costa.
KBRI Husu Deskulpa
Nune’e embaixador Indonesia ba Timor-Leste, Primanto Hendrasmoro reprezenta Estadu no Governu Repúblika Indonesia husu deskulpa ba povu Timor-Leste sobre asidente iha Suai ne’ebé TNI tiru hasoru aviaun ilegal iha Fronteira Suai.
Ministerio Negosio Estranjeiru no Kooperasaun (MNEK) liu husi Sekretario Estadu asuntu ASEAN, Roberto Soares, Tersa (04/11), bolu embaixador Indonesia mai Timor-Leste (TL), Primanto Hendrasmoro hodi esplika konaba asidente ne’ebé akontese iha fronteira Distritu Covalima ne’ebé deskonfia TNI-AU tiru iha Fronteira Covalima nian.
Embaixador Primanto Hendrasmoro esplika katak ne’e akontese fora da espetativas ne’ebé Timor-Leste no Indonesia hakarak tanba Aviaun TNI-AU ne’e laiha inisiativa atu liu fronteira Timor-Leste nian, maibe tamba duni aviaun estranjeiru nian ne’ebé semo ilegalmente iha teritorio Indonesia nian.
“Ho ensidente ne’ebé akontese iha fronteira Suai nian, ami hakarak hato’o ami nia penyesalan tamba sai hanesan preokupasaun no halo komunidade trauma iha fronteira Suai. Lori Governu Indonesia nia naran ami husu deskulpa ba ida ne’e,” hateten Embaixador Indonesia mai Timor-Leste, Primanto Hendrasmoro ba jornalista iha salaun konferensia Ministerio Negosio Estranjeiru no Kooperasaun (MNEK) hafoin esplika akontesimentu ne’e ba Secretario Estadu asuntu ASEAN, Roberto Soares.
Embaixador Indonesia ne’e informa tan katak nia rasik halo ona klarifikasaun ba Indonesia no la’os ba deit iha Jakarta, Indonesia maibe ba mós Komando Ltari Kupang, Nusa Tengara Timur (NTT) nian inklui mós Komandante Pertahanan Udara Makasar katak laloos wainhira dehan liu fronteira Timor-Leste.
Embaixador ne’e hatutan loos duni aviaun rua Sokori TNI auto terbang besik to’o duni fronteira maibe la tama iha area Timor-Leste nian tamba filtrek ne’ebé iha bele dehan katak sei iha area Indonesia nian, no objetivu iha tempo ne’e duni aviaun Ilegal ida ne’ebé tama iha area Indonesia nian la ho lisensa.
“TNI-AU duni tuir no obriga aviaun ilegal ne’e tun iha aeroportu Ltari, Kupang,” informa Primanto Hendrasmoro.
Embaixador ne’e mós rekoinese katak aviaun funu nian ne’ebé maka duni tuir aviaun ilegal ne’e nia lian makas duni tamba ne’e populasaun deskonfia tiru maibe informasaun ne’ebé embaixador Indonesia nian ne’e simu husi Jakarta no Komando TNI AU katak laiha tiru.
“Aviaun TNI nian ne’ebé semo ne’e ho velosidade makas tebes tamba ne’e maka nia lian sai ne’e makas tebes nune’e ema deskonfia hanesan tiru maibe la tiru, ne’e maka esplikasaun ne’ebé maka ha’u simu husi Jakarta,”Embaixador ne’e esplika
Embaixador Indonesia ne’e mós husu ba parte hotu labele iha dezintendimentu tamba Indonesia iha komitmentu atu hametin liu tan relasaun ne’ebé iha ho Timor-Leste.
“Ami koalia ona konaba insidente ida ne’ebé akontese horseik (Segunda) loraik iha Suai ne’ebé maka karik ita boot sira akompania, horseik karik iha aviaun funu Indonesia nian ne’ebé ke konsege semo liu lina fronteira ita nian iha Suai ne’ebé ke halo preokupasaun boot teb-tebes ba ita nia sidadaun sira iha ne’eba i mosu informasaun katak iha lian ne’ebé ke halo ema preokupa teb-tebes tamba lian sira ne’e ita rona hanesan kilat tarutu,” dehan Secretario Estadu asuntu ASEAN, Roberto Soares.
Liu husi enkontru bilateral ne’e embaixador Indonesia mai Timor-Leste, Primanto Hendrasmoro konsege halo klarifikasaun katak TNI-AU la tiru maibe lian aviaun funu nian makas tebes besik loos iha fronteira Timor-Leste nian tamba ne’e komunidade halo komunidade trauma.
“Embaixador klarifika konaba insidente ida ne’e infelizmente la’os tiruteu ida iha ne’eba, aviaun ne’e maka ninia lian boot teb-tebes, iha duni besik fornteira ne’eba, ne’eduni maka halo ita nia populasaun sira iha ne’eba hakfodak i balun tauk tamba kleur ona la rona lian hanesan ne’e,” dehan nia.
Secretario Estadu ne’e mós hatutan embaixador Indonesia nian agradese tebes, tamba liu husi enkontru ne’e bele iha klarifikasaun ba públiku sobre akontesimentu iha Covalima, nune’e labele iha dezintendimentu entre povu Timor-Leste no Indonesia.
Prezidente Komisaun B Parlamentu Nasional (PN), David Dias Ximenes “Mandati” hateten konaba akontsimentu ne’e Timor-Leste husu ona esklaresimentu ne’e diak tebes hodi nune’e bele intendemalu konaba kestaun sira iha fronteira.
Prezidente Komisaun B ne’ebé trata asuntu Defeza, Siguransa no Negosio Estranjeiru ne’e hateten katak Timor-Leste seiduak iha kapasidade hodi kontrola aero tamba ne’e husu esplikasaun deit para bele intende malu. nax/dgx
Source: Diairu JN
Share on :

1 comment:

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template