Headlines News :
Home » , , , , , , , » Governante ‘’Loby’’ Deputadu Halo Proposta

Governante ‘’Loby’’ Deputadu Halo Proposta

Written By Timor News Online on 12/09/2014 | 12:56 AM



Deputadu husi bankada Frente Revolusionario Timor-Leste Independente (FRETILIN), Inacio Morreira, hateten Primeiru Ministru (PM), Kay Rala Xanana Gusmão, lahatene tanba Governante sira’loby’’fali deputadu sira hodi halo proposta ba Orsamentu Jeral Estadu (OJE) 2015 nian ho montante US$1.5 Billoens.
Tuir deputadu Inacio katak, PM Xanana labele halimar demais ho Governante sira ne’ebé ba habosok fali deputadu para depois hodi halo liu proposta ne’ebé sira hatama ba interese ne’ebé Estadu no povu ida ne’e seidauk hatene.
Deputadu husi bankada opozisaun ne’e afirma katak to’o iha Sesta (05/12) dader proposta husi komisaun no deputadu sira nian hamutuk ualu nolu (80) maka tama ona. Ida ne’e presiza PM Xanana haree.
“Ha’u hanoin ne’e Primeiru Ministru sei fo atensaun ba asuntu ne’e ha’u hanoin sei la admiti mas hakarak hateten katak proposta ne’ebé tama tiha ona ne’e to’o ohin dadersan ha’u rona dehan iha ona oitenta (80) propostas, ida ne’e mós ejajeradu,”dehan deputadu, Incio Morreira ba JN-Diário iha Parlamentu Nasional (PN), Sesta (05/12).
Deputadu, Inacio Moreira hateten lia hirak ne’e relasiona ho proposta ne’ebé deputadu sira hatama hodi halo alterasaun, ko’a no muda orsamentu hodi aumenta item ida ba item seluk.
Deputadu ne’e afirma katak, hahú debate OJE 2015 nian iha espesialidade nia parte sei halo pontu de orden atu hodi informa ba membru Governu sira, inklui mós deputadu husi Bloku Koligasaun atu labele barailla programas ka planu Governu sira nian.
“Tamba saida maka membru Governu sira mai lobby (selok-red) fali deputadu sira, mai husi ne’e maka halo fali proposta para atu altera fali osan iha sira nia planu orsamentu ne’e, ha’u hanoin ne’e laloos. ida ne’e maka ha’u haree hanesan lahatene, laiha kapasidade para defende sira nian planu iha komite revizaun orsamentu ka iha Konselhu Ministru,”dehan, Inacio Morreira.
Tamba ne’e tuir deputadu ne’e katak laloos wainhira membru Governu sira lobby tun, lobby sa’e iha Parlamentu hodi halo alterasaun hodi tau osan ba programa sira.
Parte seluk xefe bankada partido Congresso Nacional de Reconstrucção Timorense (CNRT), Natalino dos Santos, rejeita informasaun sobre memebru Governu sira lobby iha PN nune’e deputadu sira halo proposta hodi halo alterasaun no muda orsamentu husi item ida ba item seluk.
“Lae. Laiha membru Governu ida maka mai lobby deputadu sira, se maka dehan membru Governu mai lobby deputadu sira,”Xefe bankada CNRT, Natalino dos Santos hateten hodi la fiar informasaun ne’e.
Xefe bankada ne’e hatutan tan katak membru Governu sira hato’o sira nia orsamentu liu husi komite revizaun depois Konselhu Ministru aprova lori ba PN.
Iha PN, maka deputadu sira iha kompetensia atu aumenta ou atu ko’a tamba ne’e membru Governu la presiza lobby deputadu sira.
FRETILIN La Halo Proposta Barak
Alen de ne’e konaba proposta OJE 2015 nian, husi bankada opozisaun FRETILIN sei la halo proposta barak tamba FRETILIN sei halo proposta ne’ebé maka presiza duni halo diskusaun.
“Ami iha tiha orientasoens ona, FRETILIN labele halo propostas bar-barak, maibe proposta sira ne’ebé presiza duni atu halo diskusaun klean, halo para hodi halo diskusaun tamba guiaun ne’e fo hanesan ne’e ,”deputadu, Inacio Morreira hateten.
Husi bankada CNRT, Natalino dos Santos hateten, deputadu sira barak maka iha proposta para haree atu halo adiantamentu, atu halo eliminasaun no alterasaun ne’ebé maka deputadu sira aprezenta.dgx
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template