Headlines News :
Home » , , , , , , , » Juramentu Hakribi GAM, PR Taur Konkorda-Longuinhos Laos KORK

Juramentu Hakribi GAM, PR Taur Konkorda-Longuinhos Laos KORK

Written By Timor News Online on 1/15/2015 | 2:56 AM



Prezidente Republika (PR), Taur Matan Ruak, konkorda ho programa Governu ne’ebe hala’o husi Primeiru Ministru nu’udar mós Ministru Defesa no Seguransa, hodi bolu membru PNTL no F-FDTL ne’ebé involve-an iha Grupu Arte Marsiais (GAM), atu halo juramentu hodi hakribi tiha.
“Ami mai hasoru Prezidente hodi informa situasaun kona ba horseik membru Polisia no forsa sira halo juramentu ne’e, para sira atu haree los deit ba forsa hodi husik hela ona, sira nia kor grupu Arte marsiais ne’e ona. Ho ne’e Prezidente konkorda no husu atu Governu kontrola nafatin para membru polisia no forsa labele involve an tan iha GAM ne’e,”hatete Sekretariu Estadu Seguransa (SES), Fransisco Guterres, hafoin hasoru malu ho PR Taur, Kuarta (14/01), iha Palasiu Prezidensial, Aitaraklaran, Dili.
SES Francisco hatutan, sira hirak ne’ebé bolu naran hodi husik GAM ne’e sei mai halo justifikasaun ba instituisaun. Tuir Francisco Guterres, se la iha justifikasaun entaun sai husi instituisaun, sira ne’ebe mak seidauk halo juramentu ne’e tantu iha Dili no mos Distritu sira sei halo juramentu tuir mai.
“Ba sira ne’ebe mak halo juramentu ne’e mak involve nafatin iha GAM ne’e, sai tanba sira lakohi tama iha forsa no seguransa,” Fransisco hatete tan.
Longuinhos Laos KORK
Bainhira husu kona ba Komandante Jeral PNTL, Komisariu Longuinhos Monteiro, ne’ebé ema diskonfia mós involve-an iha GAM espesial Klibur Oan Rai Klaran (KORK) maibe la halo juramentu, SES Francisco hatete, ne’e la iha evidensia atu justifika. Nia hateten, komandante Longuinhos Monteiro uluk ne’e laos tama iha GAM ruma maibe nia uluk ba halo dialogu ho GAM sira para atu labele halo violensia.
Ba kestaun juramentu ne’e, Prezidente Komisaun B Parlamentu Nasional (PN) ne’ebé trata asuntu Negosio Estranjeiru, Defeza no Seguransa, David Dias Ximenes “Mandati” hateten katak, Komando tenki foti medidas ba membru Polisia Nasional Timor-Leste (PNTL) no FALINTIL Forsa Defeza Timor-Leste (F-FDTL) ne’ebé naran tama iha lista maibe la partisipa iha serimonia juramentu.
“Ne’e desizoens politikas ne’ebé komando akapta hanesan orden, se karik sira la mai signifika iha insubmisaun, kuandu insubmisaun ne’e bolu dehan desobidensia iha kodigu penal 244 ne’e desobidensia ne’ebé ema komando bele foti medidas kontra polisia sira be lakohi mai,”Prezidente Komisaun B, David Dias Ximenes ba jornalista sira iha sala komisaun B, Kuarta (14/01).
Antes ne’e, iha informasaun balun katak Komandu PNTL mós hanesan eis membru Grupo Arte Marsiais (GAM) maibe la partisipa iha serimonia juramentu ne’ebé hala’o iha Palacio Governu.
Tamba ne’e Prezidente Komisaun B hateten koalia konaba forsa halo uluk maka reklama, la’os seidauk halo maibe reklama uluk ne’e labele.
Deputadu husi bankada opozisaun partido Frente Revolusionario Timor-Leste Independente (FRETILIN) ne’e hateten wainhira komando maka hanesan eis membru GAM maibe la tuir juramentu maka manifesta desobidensia hodi foti medidas ba eis membru GAM iha PNTL no F-FDTL ne’ebé la tuir juramentu ne’e krime.
“Iha forsa ninian ita kumpri uluk maka ita reklama dehan ida ne’e seidauk mas labele fali ida seluk seidauk ita mós halo insubmisaun, manifesta dez obidensia ne’e krime,”dehan nia.
Nune’e mós deputadu, Inacio Morreira husi bankada FRETILIN agradese ba inisitiva Primeiru Ministru (PM), Kay Rala Xanana Gusmão nian hanesan Ministru Defeza no Siguransa (MDS) foti i nisiativa hodi halo serimonia juramentu ba membru PNTL no F-FDTL ne’ebé maka durante ne’e sai hanesan eis membru GAM iha bandeira nasional Repúblika Demokratika Timor-Leste (RDTL) nia okos.
“Ho serimonia juramentu ne’e bele hatudu ona katak ita nia membru efetivus F-FDTL no PNTL ne’e sei labele involve tan, ida ne’e maka importante,”dehan Inacio Moreira.
Relasiona ho asuntu ne’e Jornalista JN-Diário tenta hodi halo konfirmasaun ba Komando Jeral PNTL, Longhuinos Monteiro iha Parlamentu Nasional (PN) hafoin hala’o enkontru ho Prezidente PN, Vicente Guterres no lideres bankada maibe Komando Jeral ne’e la fo informasaun.
Maske nune’e iha serimonia juramentu ne’ebé hala’o iha dia 13/01 , iha Palacio do Governu, Primeiru Ministru, Kay Rala Xanana Gusmão hateten juramentu ne’e sei kontinua ba membru PNTL no F-FDTL ne’ebé maka laiha tempu hodi partisipa.Nev/dgx
Source: Diariu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template