Headlines News :
Home » , , , , , , , , , » Kazu Saelari Daet Husi Problema 85, L-7 Husu Estadu Rezolve Lalais

Kazu Saelari Daet Husi Problema 85, L-7 Husu Estadu Rezolve Lalais

Written By Timor News Online on 1/20/2015 | 7:07 AM



Veteranu Cornelio Gama “L-7”, hateten, kazu Saelari daet husi problema lider sira ninian iha ailaran desde tinan 1985 to’o agora, tanba ne’e husu ba Estadu atu rezolve nune’e labele halo povu sai vitima dala ida tan.
“Agora problema hau nia alin nian ho Primeiru Ministru desde 1985 to’o agora la rezolve. Problemas uluk FRETILIN nian koalia konaba unidade nasional, koalia konaba marsista, leninista ai laran ida ne’e sira nia problema iha ne’eba to’o agora la rezolve, ne’ebe ami entrega ba Governu, parlamentu maka atu rezolve problema ida ne’e. Ami familia nia hakarak maka ida ne’e, ami hakarak oan sira eskola, oinsa para ami hetan osan ami nia oan sira eskola, oinsa maka ami bele halo natar no tos,”L-7 deklara asuntu refere ba JN-Diario Segunda (19/01) horseik iha ninia rezidensia Fatuhada-Dili hodi fo komentariu sobre problema Mauk Moruk ne’ebe sai asuntu preokupasaun Estado no entidades tomak ninian.
Iha oportunidade ne’e L-7 husu ba membru PNTL ho F-FDTL atu nune’e buka tuir Mauk Moruk ho ninia elementu sira ne’e labele halao trauma no hatauk fila fali komunidades sira.
Nia esplika katak, iha momentu Mauk Moruk ho ninia elementus sira hari’i airin bandeira tolu iha ne’eba Governu deskonfia lori forsa ba ameasa.
“Iha dia 14 polisia ba hasoru sira dehan, bele mai maibe dezarmadu, e iha dia 15 sira tama fali ho armas populasaun hamrik lori katana ta’a Polisia 1 no kaer nain 2, ida ne’e prejudika mos nia,”esplika L-7.
Nia argumenta katak Estado haruka forsa buka tuir Mauk Moruk ho ninia elementu ne’e kompetensia Governu, tanba konsidera atuasaun husi elementu Mauk ne’e krime.
Iha biban ne’e L-7 nudar maun husi Mauk Moruk deskontenti mos ho governu ne’ebe iha altura Mauk Moruk fila husi Olanda mai Timor Governu deskonfia Mauk Moruk lori kilat hatama mai Timor.
“Depois foin funu remata nia (Mauk Moruk) foti nia sasan sira iha Olanda hotu mai iha Timor sira deskonfia fali dehan kontainer rua ne’e kilat, ida ne’e mak to’o ikus mai Governu ejije Mauk kaer hatama iha kadea fulan 9 e tama kadea mos laiha faktus ida e ikus mai tribunal husik,”haklaken nia.
Eis deputadu L-7 hatutan, familias Mauk Moruk sai vitima ba funu ne’ebe Mauk Moruk ninia fen rasik ema oho hodi haketak ninia isin lolon ho ulun hodi hakoi keta-ketak, inklui oho mos ninia maun alin sira.
“Ami familia tinan 24 ami halo funu mas to’o ikus mai ami hanesan despreza porqe funu ami halo ona, ami kontribui Nasaun ne’e ami halo ona, maibe funu hotu tiha ami hanesan obral ida. Mask agora Governu hanoin oinsa para rezolve problema sira ne’e, se kaer nia ne’e sorti ona, mas nia dehan hanesan ne’e, imi ba kaer hau mas imi lori hau nia ulun hanesan hau nia fen nia ulun hau ba mas hau nia isin la ba karik governu nia hanoin oinsa??,”hateten L-7.
Entretantu L-7 mos deskontenti ho atuasaun Plisia ninia iha fatin ne’eba, tanba polisia baku rahun ninia uma bebak 3 no estraga jerador.
“Polisia laiha disiplina ba baku rahun fali hau nia uma bebak 3, hasai hotu hau nia jenerator estraga hotu ne’e mak hau dehan sala ne’e husi ida, maibe hau nia sasan estraga ne’e hanesan diskriminasaun ba ami sira be familia Mauk Moruk, Mauk nia familia ne’e laos agora deit, uluk funu ne’e nia (Mauk) nia fen mos ema tesi nia ulu fatuk, nia alin sira ema tesi ulun fatuk e familia sira ne’e ema oho hotu, agora nia nervozu hela ne’ebe ninia hanoin ne’e mak loron kalan ne’e mak hanoin deit nia fen no nia alin sira uluk ema oho,”
Pudia iha momentu Mauk sai husi prizaun ne’e sira bolu tur hamutuk koalia ida ne’e karik laiha problema.
Mauk Moruk Tenki Responsabiliza
Entretantu antes ne’e Prezidente Partidu historiku FRETILIN, Fransisco Guterres “Lu-Olo” deklara, aktu husi elementus grupo CRM ne’ebe hakanek polisia ne’e prezidenti CRM Paulino Gama ‘Mauk Moruk’, tenki responsabiliza ba aktu asalta no hakanek forsa Estadu nian. “Mauk Moruk nia grupu ne’ebé desarma Polisia hodi halo kanek, binhira polisia ba halo nia misaun servisu hahalok ida ne’e tama iha kategoria krime. Bainhira sira (PNTL) hetan asaun ida ne’e husi grupu Mauk Moruk ninian, entaun responsabilidade ne’e tenki husi Mauk Moruk nian, laos PNTL tanba PTNTL ba hala’o servisu,”
Prezidenti FRETILIN ne’e haktuir katak, deste uluk to’o agora, FRETILIN hakarak maka kria nafatin paz no estabilidade ba rai no povu ida ne’e hodi hadia povu ninia moris.
Ba kazu Saelari ne’e rasik Estadu Timor Leste mobiliza no hatun FALINTIL-Força Defesa Timor Leste (F-FDTL) ho Polisia Nacional Timor Leste (PNTL) hamutuk nain 400 hodi buka no duni tuir Mauk Moruk ho nia elementus sira.
Mauk Moruk ho nia grupu sai “buronan” Estadu nian, tanba halo perturbasaun ba ordem publiku hodi kaptura membru PNTL nain 2 no hakanek membru PNTL nain 2 seluk iha Suku Saelari, Postu Administrativu Laga, Muniçipio Baucau, foin lalais ne’e. alf
Source; Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template