Headlines News :
Home » , , , , , » Labele Mehi Atu Okupa Xanana Nia Fatin

Labele Mehi Atu Okupa Xanana Nia Fatin

Written By Timor News Online on 1/24/2015 | 4:31 AM



Eis Deputadu nu’udar mós Advogadu Privadu, Manuel Tilman hateten katak, Paulino Gama ‘Mauk Moruk’ labele mehi atu hatun Primeiru Ministru (PM) Kay Rala Xanana Gusmão hodi ba tuur fali iha nia fatin, tanba dalan atu ba ne’ebá ne’e difisil tebes.
Manuel Tilman mós halo komparasaun katak, kazu KRM ne’e atu hanesan ho kazu Alfredo Reinado nian, tanba Alfredo nian ema besik atus tolu mak sai husi Forsas Armadas, entaun Xanana aproveita situasaun ne’e, hatuun tiha Marí Alkatiri husi Primeiru Ministru (PM).
“Agora Mauk Moruk atu halo hanesan ka hodi hatuun tiha Xanana hodi tama ba Xanana nia fatin, ne’e la halo ida. Agora nia konsikuensia iha katak aktuas Xanana jere hela,”dehan Manuel Tilman ba Jornalista sira iha nia kna’ar fatin Hotel Beach Garden Pantai Kelapa Dili.
Manuel Tilman fó hanoin katak re-estrutura dalan di’ak liu du ke halo de’it remodelasaun. Maibé Manuel Tilman husu ba públiku atu rezultadu enkontru iha Oe-Cusse ne’ebá atu muda duni governu ka lae, keta halo katuas Xanana dehan agora situasaun ladi’ak, entaun seidauk bele remodela.
“Re-Estrutura ne’e dehan katak númeru ne’e bo’ot lahalimar tenke hatunba númeru ne’ebé ki’ik hodi integra didi’ak planu ne’ebé iha. Agora iha termu balun dehan hanesan ne’e Ministériu 55 ne’e kontinua nafatin muda de’it ema. Ida seluk re-estrutura dehan katak ministru hira ne’e tuun tiha ba 8 de’it, ministru ho sekretaria estadu hatuun ba 8 de’it, ida mak koordena, ida ne’e mak re-estrutura,”dehan Manuel Tilman.
Nia hatutan, durante tinan hitu nia laran PM koñese didi’ak nia ema sira ne’ebé iha prestasaun servisu ka lae no rezulta ona benefisiu saida ba povu.
Manuel Tilman dehan, tanba daudaun ne’e fundu Mina-Rai iha de’it 18 Billoens, entaun objetivu husi re-estruturasaun ne’e iha mós ligasaun ho fundu mina-rai.
“Ba ha’u, fundu mina-rai ne’ebé ita haruka ba Áfrika ho Deputadu sira ba vizita iha Vietname, ba Rússia. Embaixada sira loke arbiru iha fatin-fatin molok to’o tinan 10 ne’e ita nia 18 billoens ne’e haksoit tiha, povu Timor tenke moris tinan atus ba atus. See mak ukun agora tenke kria estrutura para povu ne’e bele la’o ba oin,”dehan Manuel Tilman.
Husi sorin seluk, Vise Diretór Fundasaun Mahein (FM) João Almeida Fernandes konsidera re-modelasaun, re-ajustamentu la’os foin mak sai debate públiku, maibé Primeiru Ministru rasik promete iha tinan hirak liu ba.
“Asuntu ida ne’e sai debate públiku ba sosiedade hot-hotu, atu akontese ka la akontese depende ba desizaun husi Primeiru Ministru, tanba poder tomak iha nia liman, ne’ebé ita hein antes de 18 Fevereiru ne’e atu akontese oinsa,”katak João Almeida Fernandes.
Nia dehan, karik re-estruturasaun ne’e akontese duni, entaun governu ida ne’ebé bokur demais maibé servisu neneik liu, entaun re-estrutura mak di’ak liu, atu nune’e redus membru governu hodi apar de’it ho planu integradu sira.
João Almeida Fernandes hatutan, durante ne’e tuir Fundasaun Mahein nia haree, estrutura ne’ebé bo’ot demais rezulta mós gastus ne’ebé karun tebes, liu-liu gastus ba bens de servisu.
Nia dehan, tenke re-estrutura duni, atu hodi orinta de’it ba servisus ne’ebé konkretu.
Iha sorin seluk, Diretur Judisial System Monitoring Program Luis Oliveira Sampaio mós hateten katak, públiku hein kleur ona remodelasaun ne’e.
“Ha’u hanoin Timor-oan hot-hotu hein hela remodelasaun ne’e, tanba públiku nia hakarak ne’e, sira nia nai ulun ne’e dinámiku oituan,”katak nia.
Maibé labele kahur ho mudansas, tanba mudansas ne’e, sempre iha nia indikasaun positivu no negativu. Entaun ho mudansas re-estruturasaun ne’ebé maka PM Xanana atu halo ne’e, publiku hein katak, ida ne’e bele lori buat foun ruma ba sistema governasaun ida ne’e.
Tuir Luis Sampaio, kuandu re-estruturasaun ne’ebé maka PM Xanana atu halo ne’e ba interese no moris di’ak povu nian, povu Timor Leste tomak apoiu.
“Maibé ema barak mós duvida, tanba promesas hanesan ne’e, dala barak ona, maibé nunka atu realiza,”katak Luis Sampaio.
Director JSMP ne’e hateten tan, Governu ida ne’e la’o neneik liu, tanba membru governu sira lahatene atu halo buat ida. Kuandu ema husu buat ida ba sira, sira hatete ba ema ne’e katak, PM Xanana maka hatene.
Nia dehan, hanesan politiku nain ida iha governu ida ne’e nia laran, membru governu sira mós tenki hatene distinu governu ne’e nian ne’e atu to’o iha ne’ebé, no li-liu koredenasaun politika entre sira ne’e, tenki la’o diak. Membru governu sira labele halo fali buat ida hanesan fali segredu, tanba Estadu promove demokrasia ne’e atu ema hotu bele partispa hodi hatene saida maka la’o iha governu ne’e nia laran.
Luis Sampaio dehan, durante ne’e ema hotu hakilar katak, governu ne’e bo’ot tebes, maibé ninia rezultadu servisu ne’e laiha, tanba osan barak liu maka koloka ba atu selu membru governu sira no membru governu barak liu maka halo planu sai ba rai liur, entaun osan barak liu maka halai sai hotu ba rai liur.tap
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template