Headlines News :

Mauk Moruk Tenki Kopera Ho Estadu

Written By Timor News Online on 1/20/2015 | 7:39 AM



Prezidente Parlamentu Nasional (PN), Vicente Guterres, apela ba grupo Mauk Moruk nian atu koopera ho Estadu nune’e bele hakotu problema ne’ebé akontese iha Suku Saelari, Postu Administrativu Laga, Munisipiu Baucau.
“Buat ne’ebé halo tiha ona konserteja sei iha konsekuensia mas labele agrava liu tan, halo apelu atu koopera atu bele hakotu problema ida ne’e,”dehan Prezidente PN, Vicente Guterres iha plenaria PN Segunda (19/1).
Prezidente PN ne’e hateten, Timor-Leste hanesan Estadu ida ne’ebé adopta sistema direitu demokratiku entaun ema hotu-hotu iha oportunidade atu manifesta ninia pensamentu, ninia ideia maibe ho forma ida kriminal labele tanba halo halo asaun ne’ebé maka kria fali instabilidade iha rai laran.
Prezidente PN, Vicente Guterres hatutan, iha tempu rezistensia Timor-oan hotu fo kontribuisaun ba rai ida ne’e, entaun iha tempu ukun an atu kontribui tan ba dezenvolvimentu rai ida ne’e mak tenki koopera ho Estadu.
“Ha’u hanoin katak ita apela ba ita nia maun alin sira ne’e barak liu kontribui ba rai ida ne’e, ha’u hanoin atu kontribui tan ba rai ida ne’e tenki iha dialogu entre ita, koopera ho Estadu atu bele hetan diak ba ita nia rain, diak ba ita nia povu,”dehan tan Prezidente PN ne’e.
Nune’e mós, Segundu Vise Prezidente Parlamentu Nasional (PN), Aderito Hugo da Costa sekunda katak diak liu mak grupu Mauk Moruk tenki koopera ho Estadu hodi buka solusaun ba problema ne’eb’e akontese.
Aderito Hugo mós fiar katak, kazu kriminal ne’ebé akontese iha suku Saelari, ne’e sei la fo ameasa ba estabilidade nasaun nian. Tamba oras ne’e dadauk Polisia Nasional Timor-Leste (PNTL) apoiu husi FALINTIL Forsa Defeza Timor-Leste (F-FDTL) hala’o ona atuasaun hodi rekopera ka mantein fali orden públiku depois akontesementu.
“Laiha ameasas. Ita bo’ot sira hatene depois de akontesementu ne’e iha loron ne’eba kedas ita ninia polisia halo kedas atuasaun iha sirkulasaun normal hela, sirkulasaun entre trosu ida Lospalos mai Baucau, mai Dili la’o hela hanesan mós trosu ida husi Laga ba Baguia no fatin sira seluk,”dehan tan Segundu Vice Prezidente PN, Aderito Hugo iha Parlamentu Nasional.
Segundu Vise Prezidente PN husi bankada Congresso Nacional de Reconstrucção Timorense (CNRT) ne’e hatutan, oras ne’e dadauk PNTL mantein hela situasaun iha parte postu Laga nian no kontinua halo buska ba grupo eis Komandante Brigada Vermella iha tempu rezistensia, Mauk Moruk nian. Prezidente Konselhu Revolusaun Maubere, Mauk Moruk ho nia grupu halo atake ba membru polisia iha dia (15-01), no rezulta membru polisia nain tolu kanek no nain rua detein husi grupu Mauk Moruk nian. maibe PM Xanana ho Polisia sira ba liberta tiha ona membru polisia ne’ebe mak detein ne’e.
“Polisia mantein hela situasaun iha ne’eba (Saelari-red) no halo nafatin buska ba sira (grupo Mauk Moruk-red) ne’ebé komete ba aktus ne’e,”dehan Hugo.
Oras ne’e dadauk grupo Mauk Moruk nian halai sai ona husi fatin akontesimentu no subar an iha foho leten.
Relasiona ho rezolusaun ne’ebé maka Parlamentu Nasional (PN) hasai iha tinan kotuk hodi halo atuasaun ba Grupo Mauk Moruk nian inklui grupu ilegal sira seluk, Segundu Vise Prezidente PN, Aderito Hugo hateten katak, rezolusaun ne’ebé maka hasai ona ne’e atu mantein orden públiku tambe ne’e polisia iha referensia sufisiente hodi halo atuasaun ba Grupu Mauk Moruk nian.
“Ita kontente tamba akontese tiha ema ne’ebé hanoin a’at, ema ne’ebé hanoin atu estraga ne’e mosu, konfrontal hanesan ne’e maka diak, frontal hanesan ne’e maka ita hatene, ne’e para sosiedade sivil, públiku sira mós bele halo analiza durante halo analiza bar-barak katak ida ne’ebé maka loos tamba dala ruma ita sai santiniu hotu deit, dala ruma proteje fali ema ne’ebé hanoin a’at hela,”dehan nia.
Rezolusaun ne’ebé maka PN hasai hodi halo atuasaun ba grupu ilegal sira iha nia kobertura depois tinan sanulu (10) resin ema barak, rihun ba rihun moris iha vida konsentrasaun obrigatoriu, kolekta kontribuisaun obrigatoriu ne’e sala tiha.
Iha fatin hanesan Vice Prezidente bankada opozisaun Frente Revolusionario Timor-Leste Independente (FRETILIN), Josefa Soares, hateten grupu Mauk Moruk nian halo asaun kriminal duni maibe povu tomak tenki tau konfiansa nafatin ba PNTL no F-FDTL bele espera ka hakat liu situasaun sira ne’e ho estabilidade no paz.
“Ha’u hanoin katak iha akontesementu sim. faktus sim. Maibe ita hotu tenki tau konfiansa forsa de seguransa no mós forsa defeza Timor-Leste,”dehan deputada, Josefa Soares.
Deputada ne’e hatutan akontesimentu ne’e husi Estadu sei hola medidas no buka tuir grupo Mauk Moruk hodi kaptura.
Oras ne’e dadauk PNTL apoiu husi F-FDTL hala’o hela atuasaun ba grupu Mauk Moruk nian iha Saelari tamba ne’e povu tomak tenki fo kontribuisaun inklui mós eis Komandante Brigada Vermella, Mauk Moruk hodi koopera intrega an nune’e labele hamosu tan konflitu iha rai ida ne’e.
Iha plenaria Deputadu Francisco da Costa, esplika katak, nia parte haree diretamente fatin akontesementu no kareta ne’ebé sunu inklui mós sede suku ne’ebé maka grupu ne’e baku rahun. tamba ne’e deputadu ne’e afirma katak asaun ne’ebé maka grupu Mauk Moruk halo ne’e ilegal duni, presiza halo kapturasaun hodi prosesa tuir lei ne’ebé vigora.
“Hakarak informa ba iha uma fukun ida ne’e katak grupu Mauk Moruk halo akampamentu ne’e fetu loloos kompana ne’ebé guerileiru sira momentu kuandu Indoneisa atake Timor-Leste,”dehan nia.
Deputadu ne’e esplika, Grupu Mauk Moruk la’os uza sivil maibe uza farda hanesan militar, tamba ne’e deputadu ne’e hateten grupu sira hanesan ne’e lamerese ejiste iha Timor-Leste tamba kontra konstituisaun República Democratica Timor-Leste (RDTL).
“Asaun ida ne’e ha’u hanoin ilegal duni no la merese duni atu ejiste tamba seguransa maka polisia no forsa maka F-FDTL, laiha tan grupu seluk ho farda militar,”esplika nia.
Deputadu ne’e mós duvida ho Tribunal ka pessaol justisa sira tamba antes ne’e Mauk Moruk tama ona iha prizaun maibe laiha evidensia nune’e husik fila-fali maibe hafoin husik kontinua halo asaun ne’ebé hanesan. Tamba ne’e tenki halo kapturasaun hodi prosesa tan tuir lei ne’ebé vigora.dgx
Source: Diairu JN
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template